De Kollektiv "Save Co-Housing in Esch" hat zu dësem Rassemblement opgeruff.

Am Mëttelpunkt stoung déi ëmstridden Decisioun vun der Escher Gemeng, d’Colocatioun an der Minettmetropol méi streng ze reegelen. Deemno solle Leit, déi net zu enger Famill gehéieren, just nach da beienee wunnen, wa se all zesumme mam Proporiétaire e gemeinsame Kontrakt ënnerschriwwen hunn. Dëst fir Sous-locatiounen vun Zëmmeren zu héije Präisser a schlechte Konditioune ze verhënneren. D’Manifestanten hunn dës Argumenter net gëlle gelooss. Als Kollektiv “Save Co-Housing Esch” sinn eng Rei Associatiounen am soziale Beräich, Parteien a Gewerkschafte fir d’Wunnrecht op d’Strooss gaangen. Virwërf goufen et der eng Rei. Ënner an erëm vum Line Wies vun déi Lénk, Member am Escher Gemengerot:

D’Gemeng Esch huet an de leschten 10 Joer quasi keng lokativ sozial Wunnenge gebaut. Verschidde Gemengewunnenge sinn onbewunnt an dobäi gi se dringend gebraucht.

D’Wunngemeinschafte wäre fir Leit mat wéineg Akommes, eng vun den eenzege Léisungen, fir sech iwwerhaapt en Daach iwwer dem Kapp ze leeschten. D’Iddi vum gemeinsame Bail vum Escher Schäfferot géif géint déi Leit goen, déi op sozial Hëllef ugewise wieren, kritiséiert de Gary Diderich vun der Life asbl.

Dat heescht, jidderee muss an engem Kontrakt sinn. Wat dozou féiert, datt deen deen eppes verdéngt quasi muss opkommen, fir deen dee vläicht momentan kee Verdéngscht huet. An dat ass e Problem a weist nieft anere Saachen, datt et dem Escher Schäfferot net drëm geet, fir di kommerziell Anbieter ze blockéieren an d’Wunne méi abordabel ze maachen. Mee et weist, datt si keng Sozialfäll zu Esch méi wëllen hunn.

D’Politik sollt ophalen, mat neie Reglementer Leit a Wunnengsnout Steng an de Wee ze leeën, esou den allgemenge Konsens op der Manifestatioun.

Géint sougenannt Kaffiszëmmeren oder Agencen déi eenzel Zëmmeren zu horrende Präisser verloune géifen, misst ee virgoen. Do waren d’Manifestante sech eens. Awer mat de richtegen Instrumenter.

Am Virfeld vun der Manifestatioun hunn d'Escher Gemengeresponsabel eng Partie Explikatiounen ginn. Sou heescht et an deem Schreiwes, datt misste genee d'Definitioune verstane ginn: An enger Colocatioun hunn all d'Awunner vun enger Wunneng e Contrat de bail mam Besëtzer ënnerschriwwen. Bei der Sous-Locatioun, wéi zum Beispill a Kaffiszëmmeren, verlount eng Persoun Wunnenge weider un anerer.

Och d'juristesch Situatioun stellt sech fir d'Escher Gemeng net als einfach Affär duer, mee et géife verschidde Gesetzer a Reglementer spillen, jee no Wunnsituatioun a Kontrakter.

Eng interessant Äntwert gëtt d'Escher Gemeng op d'Fro, firwat grad elo dës Diskussioun héich kacht: Well vill Suen am Spill wieren. Et wier nämlech zum Beispill an der Realitéit de Fall, datt en Eefamilljenhaus géif u 5 bis 7 Locatairë verlount ginn, amplaz nëmmen un eng Famill. 3 Mol Nee seet d'Gemeng dann op d'Fro, ob se géint Colocatioune wier - dës Wunnform wier nämlech explizitt am PAG virgesinn, virausgesat et gëtt e gemeinsame Locatiounskontrakt, dee vun allen och signéiert gouf.

De kompletten Q&A vun der Escher Gemeng zum Thema vun de Co- an de Sous-Locatioune kënnt Dir hei noliesen.