Corona, internt Gestreits an net déi bescht Wäerter bei Ëmfroen - d'CSV huet e Samschdeg a schwieregen Zäiten zu Zolwer de Point gemaach.

Den Nationalkongress vun der CSV war dëst Joer gréisstendeels virtuell. Um Riednerpult gouf vill iwwer d'Regierung geschwat an e bëssen iwwer CSV-Internes.

CSV-Natinalkongress / Reportage Pit Everling

Et war e mouvementéierte Summer aus CSV-Siicht an dee Constat gouf och esou gemaach e Samschdeg. D'Sortie vum CSV-Chef Frank Engel mat der Ierfschaftssteier war jo parteiintern deem engen oder anere sauer opgestouss.

De Frank Engel: Et ass kloer, datt et Dissonanze goufen a kee Gläichklang tëscht den Optrëtter vun deenen engen an deenen aneren.
Mir mussen all doraus léieren an am Virfeld dofir Suergen, datt Dissonanze verschwannen an datt se dobaussen net méi ze gesi sinn.

Dat ass d'Konklusioun: et sollen intern Debatte gefouert ginn an zwar iwwer eng ganz Rëtsch Themen.

De Renouveau gouf um Kongress vum Paul Galles verkierpert, den Deputéierte mécht jo den Interim um Poste vum Generalsekretär, soulaang wéi de Felix Eischen krankheetsbedéngt absent ass. De Paul Galles huet fir déi Chrëschtlech-Sozial 3 Missiounen definéiert: Éischtens soll een e positive Message ginn a jidderengem eng Plaz ubidden.

Déi zweet ass et fir e konkrete Message ze hunn, dee realistesch ass. Bei eis geet dat duerch d'Préiwung vun all deenen, déi an de Gemenge Responsabilitéit hunn. Mir sinn d'Partei vun der Basis.

Déi drëtt Missioun ass fir e gemeinsame Message auszeschaffen, wat ënnert anerem an Aarbechtsgruppe soll geschéien.

Ee grousst Thema ass de Logement, eng Situatioun, déi lo net méi ze toleréiere wier, seet de President Frank Engel.
D'CSV wéilt d'Saach elo an de Grapp huelen a setzt op d'Zesummenaarbecht mat chrëschtlech-soziale Gemengevertrieder.

Fir dat ze maache ruffe mer an den nächste Méint eis CSV-Buergermeeschtere beieneen, fir un enger Bauoffensiv ze schaffen. D'Regierung wäert virun e "Plang" gestallt ginn. An da soll se eis soen, datt se dat net wëllt. Well a Wierklechkeet wëll se net, datt sech um Wunnengsmisär eppes ännert. Mä da wëssen d'Leit et wéinstens och."

Och soss gouf am Artikuss zu Zolwer kee gutt Hoer un der Regierung gelooss. D'Covid-Kris gëtt net sou geréiert wéi d'CSV-Fraktiounscheffin Martine Hansen sech dat virstellt. D'CSV hätt dem Staatsminister scho Mëtt der Woch gesot, datt ee sech misst Suerge maachen an datt eppes misst geschéien.

"Du sot de Premier, et wier net sou schlëmm an et wier alles an der Rei, nach en Donneschdeg huet en eis Reaktiounen an d'Lächerlecht gezunn. Lo wou Frankräich an den Här Macron eppes decidéiert huet, elo op eemol beweegt sech den Här Bettel och. Et kéint ee mengen, den Här Macron, dat wier de richtege Premier hei vu Lëtzebuerg."

Et wier Chaos an de Schoulen an den Tracing géing net méi funktionéieren, sou d'CSV weider. Eng Mesure, déi gefuerdert gëtt, ass eng Maskenobligatioun an Deeler vum ëffentleche Raum.