D'Fuerderung, dass d'Staatsbeamten an der Dispens aktuell just nach 80 Prozent vun hirer Pai solle kréien, gëtt vun der CGFP staark kritiséiert.

Déi nei fiskal Mesuren, de Staatsbudget, d'Investissementer an d'Zukunft, eng gesetzlech Basis fir d'Aarbecht vun doheem aus, dat stoung am Fokus e Mëttwoch op der Rentrée fir den Nationalcomité vun der Staatsbeamtegewerkschaft CGFP. Déi héich Vertrieder vun der CGFP hu sech mat den aktuellen nationalen Dossiere beschäftegt. Ma virop hunn si sech e Mëttwoch op der Pressekonferenz géint eng Federatioun gewiert. An zwar déi vun den Handwierker.

Consternéiert. Dat ass ass wuel dat Wuert, mat deem een d'Reaktioun vun der CGFP op déi rezent Fuerderung vun der Federation des Artisans beschreiwe kann. Gefuerdert gouf, dass Staatsbeamten, déi aktuell aus diverse Grënn net schaffen, just nach 80 Prozent vun hirer Pai solle kréien. Genee ewéi Salariéen, déi jo och 20 Prozent manner kréien, wa se an der Kuerzaarbecht sinn. Respekt fir all d'Handwierker seet de CGFP-President Romain Wolff: "Manner Respekt par konter verdéngen déi rezent Aussoe vun hiren héije Vertrieder."

Si géifen domat sozialen Näid schafen, an Zäiten, an deenen et besser wär zesummenzehalen, esou de Romain Wolff. Et wär och falsch ze behaapten, dass de Gros vun de Staatsbeamte wärend der Kris net geschafft hätt. De Gros hätt vun doheem aus geschaaft. Nëmmen e ganz klengen Deel vun de Beamten, déi wou den Teletravail net méiglech ass an déi zousätzlech nach vulnerabel sinn, hätten eng Dispens gehat. De Romain Wolff resüméiert:

"Mir hunn net erausfonnt, wiem et eppes soll bréngen. Mir wëssen awer, wann dat do sollt gemaach ginn, da wär all Mënsch perdant. Och den Handwierker selwer. Am Moment ass et jo esou, dass d'Leit Sécherheet brauchen. Si investéieren dann, wann se eng gewësse Sécherheet hunn. Wa se awer domat musse rechnen, dass se och elo erëm hiert Gehalt gekierzt kréien, dann ass dat net gutt. Dat ass net gutt fir d'Relance an dat ass och net gutt fir d'Kafkraaft."

En Eegegol fir d'Handwierker deemno. D'CGFP wëll awer net weider streiden. Bei der nächster Reunioun vun der Tripartite wéilt ee mam Patronat zesummeschaffen.

D'CGFP huet awer och selwer Fuerderunge gestallt – un d'Regierung virop: kloer Reegelen zum Beispill. An zwar fir de sougenannte Homeoffice. E Gesetz oder en Arrêté Grand-Ducal.

D'Regierung soll dann och net ophale mat investéieren. D'Staatsschold wär nach am grénge Beräich an d'Tauxen op Kreditter sinn niddreg. De Generalsekretär Steve Heiliger:

"D'Politik seet och ëmmer, mir dierften den zukünftege Generatioune keng Schold hannerloussen. Jo! Mä als CGFP stelle mir awer d'Fro, ob net grad do, wou d'Investissementer den zukünftege Generatiounen eppes bréngen, firwat net grad do ze soen, dass si och en Deel dovunner mat finanzéieren."

D'Staatsbeamtegewerkschaft ass géint eng Ierfschaftssteier. Se begréisst déi zwou nei fiskal Mesuren: déi méi héich Besteierung op Immobiliëfongen an d'Ofschafung vun de faméise Stock Options. Déi nei CO2-Steier op Bensin an Diesel kéint een allerdéngs net akzeptéieren. Déi géif virun allem nees d'Mëttelschicht treffen an dat kann der CGFP net passen.

Den Accord salarial am Service public leeft Enn des Joers aus. Wéini genee d'Staatsbeamtegewerkschaft mat engem Katalog un d'Regierung eruntrëtt, konnt de President Romain Wolff e Mëttwoch net soen. Deemno och net, wéini dass iwwert den eventuellen neien Accord kéint verhandelt ginn.