E Freideg trëtt a Frankräich den neie Confinement a Kraaft. Dat suergt fir e groussen Undrang op d'Pompelstatiounen zu Lëtzebuerg.

D'Awunner a Frankräich dierfe just nach ënner bestëmmte Konditiounen d'Wunneng oder d'Haus verloossen. Si dierfe weiderhin op d'Aarbecht, bei den Dokter goen, dat Néidegst akafen oder anere Mënschen hëllefen. Séier emol iwwert d'Grenz fueren, fir ze tanken oder anzekafen, ass bis den 1. Dezember also net méi méiglech.

Am Süde vu Lëtzebuerg sinn d'Repercussioune vun den neie Restriktiounen, déi vum 30. Oktober u gëllen, däitlech ze spieren. Ënnert anerem zu Rëmeleng a Péiteng huet et en Donneschdeg ferm gestaut ronderëm d'Bensinsstatiounen.