Déi Zuele kruten d'Deputéiert an de Gesondheets-, bannenzegt Sécherheet- a Justizkommissiounen de Freideg de Mëtte presentéiert.

Et ass deels schwéier ze iwwerpréiwen, ob d'Leit sech un déi aktuell Covid-Mesuren halen, zum Deel well d'Reegelen net kloer genuch sinn an zum Deel, well se sou dacks änneren. Zu där Conclusioun koumen d'Oppositiounsdeputéiert no enger gemeinsamer Sëtzung vun de Santés-, bannenzegt Sécherheet- a Justizkommissiounen.

Covid-Kontrollen/Reportage Fanny Kinsch

Vu Mäerz bis November hätt d'Police eng 17.000 Kontrolle gemaach an 3.500 Protokoller geschriwwen. Déi grouss Majoritéit vun de Leit hätt ganz asiichteg reagéiert. D'Police hätt awer selwer gesot, datt et a verschiddene Situatioune schwéier wier, d'Anhale vun de Mesuren ze iwwerpréiwen, sou den Deputéierte vun déi Lénk Marc Baum.

"An deem neien Text steet dran, datt Rassemblementer, wat awer entretemps alles ka sinn, vu méi wéi 4 Leit, muss een esouwuel d'Mask unhunn, wéi och 2 Meter Ofstand hunn. Wéi wëll een esou eppes an enger Foussgängerzone maachen?"

D'Kontrolle vun de Persounen, déi nuets ënnerwee sinn, kéinte vu Patrull zu Patrull ënnerschiddlech verlafen, well net kloer wier, wéi d'Leit beweise missten, dass si ënnerwee op d'Aarbecht wieren.

"Wéi eng Pabeiere muss ee virweise kënnen, wann ee legal ënnerwee ass? Brauch een dann zum Beispill no der Spärstonn en Déngschtplang oder net?", esou den ADR-Deputéierte Jeff Engelen.

Wat d'Kontroll vun der Limitatioun vu Persounen an de Grandes surfacen ugeet, waren d'Deputéiert net zefridde mat den Explikatiounen, déi se kruten, esou de Piraten-Deputéierte Marc Goergen.

"Do gouf elo eng nei Spillkonsol virgestallt, op eemol waren d'Supermarchéë voll gelaf an do hunn ech déi iwwerraschend Äntwert kritt gehat, jo da misst de Supermarché an deem Fall d'Police ruffen, wann op eemol ze vill Leit dobanne sinn."

Doriwwer eraus wier et och fir d'Geriichter deels schwéier nozevollzéien, ob eng Persoun géint eng Reegel verstouss hätt oder net, well dës esou dacks géifen änneren, esou deN CSV-Deputéierte Claude Wiseler.

"Eng Lektioun, déi ech draus zéien, dat ass, datt mer wierklech an deenen Texter, déi mer stëmmen, esou einfach wéi méiglech, esou kloer wéi méiglech solle sinn, well et ass d'Kloerheet vun den Texter, déi d'Securité juridique mat sech bréngt, et ass d'Einfachheet vun den Texter, déi se och besser akzeptabel a besser applicabel a besser controlabel mécht."

Zanter dem 16. Mäerz hätt sech d'Gesetz am Ganzen 20 mol geännert, sou iwwerdeems nach de Marc Baum vun déi Lénk - wann et scho fir d'Police an d'Justiz esou schwiereg wier, d'Anhale vun de Mesuren ze kontrolléieren, kéint een och net vun de Bierger erwaarden, dass déi se verstoen an anhale kéinten.