Déi nei Mesure wäerte vun en Donneschdeg u bis emol de 15. Dezember gëllen. Vun der Oppositioun gouf et vill Kritik.

Reaktiounen op neit Covid-Gesetz / Reportage Fanny Kinsch

E Mëttwoch gouf an der Chamber de Gesetzprojet 7694 guttgeheescht, mat deem eng Rei nei, méi streng Mesuren an der Lutte géint d'Corona-Pandemie agefouert ginn. Dës Mesurë wäerte vun en Donneschdeg bis de 15. Dezember gëllen.

Reaktiounen a Kritik aus der Chamber

Mir verstinn, datt d'Regierung u méiglechst ville Schrauwe wëll dréinen, mä d'Koherenz, d'Effikassitéit an d'Novollzéibarkeet misst analyséiert ginn. Dat sot d'Deputéiert vun déi Gréng Josée Lorsché e Mëttwoch an der Chamber am Kader vum Vott iwwert dat neit Covid-Gesetz. D'Josée Lorsché huet d'Decisioun, d'Theateren an d'Kinoen zouzemaachen, wärend d'Kierchen opbleiwen, inkoherent genannt.

"Ganz sécher stelle mer d'Grondrecht op d'Ausübe vun engem Culte net a Fro a mir ënnerstëtzen och d'Decisioun, d'Kierchen zu deem Zweck opzeloossen an domat e gewësse Risiko a Kaf ze huelen. Deem géintiwwer muss et awer och erlaabt sinn, de Stellewäert vun Theater a Kino als vitale Pilier vun eiser fräier an opgekläerter Demokratie ze beweisen. Béid Secteuren déngen net just der Ënnerhalung oder Fräizäitgestaltung, wéi zum Beispill d'Casinoen, mee hunn eng systemrelevant Funktioun, well se zu der interkultureller Expressiounsfräiheet, zu der Meenungsbildung an domat och zum Iwwerliewe vun eiser Demokratie bäidroen an dat op d'mannst sou staark wéi oppe Kierchen."

D'Josée Lorsché

D'Deputéiert vun déi Gréng huet donieft betount, datt et wichteg wier, datt iwwert de 15. Dezember eraus gekuckt gëtt an ee sech elo Gedanke mécht, wéi et weidergoe soll. An den Ae vun der gréisster Oppositiounspartei hätt een d'Situatioun zum Deel einfach lafe gelooss, gewaart a gekuckt. Dat sot den CSV-Deputéierte Claude Wiseler. D'Mesurë géifen net erkläert an net beluecht ginn, huet de Claude Wiseler kritiséiert. Am Bezuch zu der Fermeture am Horesca huet hie vu Kommunikatiounsproblemer geschwat.

"Virun e puer Wochen ass nach gesot ginn, datt d'Horesca kee Problem hätt, datt et net do wier, wou d'Leit sech géifen ustiechen, datt jo all d'sanitär Mesuren am Gesetz festgesat gi wieren an d'Leit sech éischter doheem géifen ustiechen wéi am Horesca-Beräich. An elo ass alles anescht, et gëtt alles zougemaach. An ech soen net, datt dat net soll sinn, à priori si mer jo d'Accord, mee mir hätte vun der Regierung verlaangt, datt se eis gesot hätten, wat changéiert huet. Oder datt se et méi fréi gemaach hätten. Elo krute mer gëscht eng Etüd vum OMS, wou dra steet, datt am Horesca-Secteur vill Infektiounskette stattfonnt hätten. Mee déi Etüd ass vum 9. Juli. Zanterhier hu mer eng ganz Partie Texter gestëmmt, wou eis permanent de Contraire gesot ginn ass."

De Claude Wiseler

D'CSV hätt Problemer mat der Argumentatioun an der Manéier, wéi d'Regierung den Dossier vun de Restriktioune géif ugoen. Et géifen drastesch Mesurë wéi d'Ausgangsspär verlängert ginn, ouni datt een eng Evaluatioun hätt, wat de Couvre-Feu bis ewell bruecht hätt. Wa Mesurë geholl ginn, misste se och op hir Effikassitéit kontrolléiert ginn, huet de Claude Wiseler nach betount.

Irrational an net novollzéibar, esou huet den Deputéierte vun déi Lénk, Marc Baum, en Deel vun de Mesureë genannt. De Couvre-Feu wier vun Ufank un onnëtz an absurd gewiescht an dierft an den Ae vun déi Lénk dofir och net verlängert ginn. Eng aner Reegel, mat där si sech immens schwéier dinn, ass déi, wéi ee sech privat nach treffen dierf.

"Aus engem sanitäre Point de Vue ass 2+3=5 an 3+2=5. Dat kritt dir de Leit dobaussen net erkläert a wann der et net erkläert kritt, dann halen d'Leit sech net drun oder fanne Weeër, fir et ze ëmgoen. Et ass dofir net rational an et soll een et net maachen, well et net zilführend ass am Kampf géint de Virus. Et féiert dozou, datt effektiv net méi d'Famill mat de Kanner bei d'Boma an de Bopi ginn, mee ëmgekéiert. Mee d'Resultat wäert sech net änneren."

De Marc Baum

Vun en Donneschdeg u musse jo och d'Caféen a Restauranten erëm zoumaachen. D'ADR wier kloer géint d'Fermeture vum Horesca-Secteur gewiescht, huet de Jeff Engelen betount. Hien huet sech d'Fro gestallt, ob d'Regierung der Meenung wier, datt dee Secteur fir eng Hausse vun den Neiinfektioune responsabel wier.

"Souwäit ech aus eegener Erfarung weess, hu grad si sech all penibel un d'Virschrëften gehalen an elo gi si och nach dofir bestrooft. Si hu schonn am meeschte gelidden a mussen dann elo nach eng Kéier bludden."

De Jeff Engelen

Eng weider Mesure ass jo och d'Fermeture vu Kinoen an Theateren. Onverständlech ass et fir de Marc Goergen vun de Piraten, datt awer d'Kierchen opbleiwen.

"Dat ass eng Formule aus dem Mëttelalter, fir déi eis Regierung sech entscheet huet an déi 3 Majoritéitsparteien och haut hei stëmme wäerten. Dem Theater an domat der fräier Meenungsäusserung sot der mam Vott nee, mee Reliounen dierfe weider viru Leit optrieden. Dat ass rengen Aktionismus, bedenklechen Aktionismus souguer."

De Marc Goergen

De Marc Baum vun déi Lénk huet ënnerstrach, datt ee mat där Mesure d'Culten an d'Kultur géinteneen ausspille géif.

Mesuren am Iwwerbléck

Neit Covid-Gesetz - Reportage Fanny Kinsch

De Coronavirus wier den Ament iwwerall an der Gesellschaft present an et wier mat der aktueller Zuel vun Infektiounen net méiglech, d'Infektiounsketten ze briechen, dowéinst géif dat neit Gesetz déi Plaze viséieren, op deenen et méi warscheinlech ass, sech unzestiechen, déi elo mussen zoumaachen - esou d'Begrënnung vun deenen neie Mesuren.

Dat betrëfft konkret:

- d'Restauranten an d'Caféen, ausser fir Take-Away a Livraisounen,

- Kinoen, Spillhalen, Casinoen, Foiren a Salonen,

- Kulturell Etablissementer, mat Ausnam vu Muséeën, Ausstellungen, Bibliothéiken an Archiven,

- Zoue Sportinfrastrukturen, Fitness-Zenteren a Schwämmen, mat Ausnam vum Elite-Sport, vum Schoulsport a fir Persounen, déi eng Prescriptioun vum Dokter hunn,

- Sportlech Fräizäitaktivitéiten dobaussen zu méi wéi 4 Persoune si verbueden,

- D'Ausgangsspär vun 11 Auer Owes bis 6 Auer Moies gëtt verlängert,

- An et dierf een nëmmen nach 2 Persoune bei sech Doheem empfänken, déi aus deem selwechte Stot kommen.

Un dësem Punkt hat ënnert anerem de Staatsrot sech gestéiert, deen net novollzéie konnt, firwat net einfach vun engem Stot géif geschwat ginn, ouni d'Zuel vu Persoune festzeleeën. Déi Propositioun krut allerdéngs keng Majoritéit an der Gesondheetskommissioun - wéi Vertrieder vun DP an LSAP hei op der Antenn erkläert hunn, wéilt een, datt d'Leit doheem bleiwen, et hätt een nëmmen déi Méiglechkeet, fir 2 Persounen z'empfänken, opgelooss, fir dass keen ze vill eleng ass.

D'Strofen, wa sech net un d'Mesurë gehale gëtt, ginn erop op 4.000 Euro.

Weider gëllt, datt ee muss eng Mask unhunn an 2 Meter Ofstand halen, wann een zu méi wéi 4 ass, déi net aus engem Stot sinn, vun 10 Persounen u muss een iwwerdeems designéiert Plazen hunn an Evenementer vu méi wéi 100 Leit bleiwe verbueden, mat Ausnam vun Demonstratiounen, Mäert an dem ëffentlechen Transport. Am ëffentlechen Transport muss een och keng 2 Meter Distanz hunn, beim Ausübe vum Demonstratiounsrecht, bei Begriefnisser, um Maart an am Musée muss een iwwerdeems keng designéiert Plaz hunn.

Och d'Limitatioun vun engem Client op 10 Meter Carré an de Grandes Surface bleift bestoen.

Plazen, déi exklusiv fir d'Ausübe vun enger Relioun genotzt ginn, dierfen opbleiwen, soulaang d'Mesurë fir Rassemblementer respektéiert ginn.

D'Regierung war iwwerdeems de Mëttwoch de Moien nach eemol zesummen, fir de Point vun der Situatioun ze maachen an och iwwer méiglech Hëllefen ze diskutéieren.

An der Schoul gëllen iwwerdeems vun nächstem Méinden un nei Reegelen, déi sinn awer net an deem hei Gesetz, ma goufe vum Educatiounsminister decidéiert.

Schreiwes

Précisions concernant les activités de restauration au sein des entreprises (26.11.2020)

Communiqué par: ministère de la Santé

Suite à une interrogation soulevée en fin de séance publique de la Chambre des Députés du 25.11.2020 au sujet de la position du ministère de la Santé concernant la situation des cantines d'entreprises et plus particulièrement des cantines en milieu hospitalier, le ministère de la Santé tient à préciser que l'extrait d'un échange de courriel cité séance tenante et qualifié de communiqué du ministère de la Santé, n'émane ni du ministère de la Santé, ni de la Direction de la santé tel qu'allégué, mais bien d'un autre auteur ne relevant pas de l'autorité de la ministre de la Santé.

Afin d'éviter de plus amples malentendus, le ministère de la Santé tient à réitérer et à préciser que les activités de restauration accessoires des entreprises bénéficient, au même titre que toute autre activité de restauration, de l'exception légale prévue par la loi votée le 25.11.2020 qui autorise le maintien des activités de « service de vente à domicile, de vente au volant et de livraison à domicile ».

En ce sens le fonctionnaire du ministère de la Santé visé en séance publique, qui figurait certes parmi les destinataires du courriel cité et expédié à 17h47, a pris soin de préciser aussitôt à 17h57 par retour de courriel que c'est bien la formule du « take away », tel que permise pour le secteur HORECA, qui est également préconisée pour les cantines hospitalières, ceci en concordance avec la position de la ministre telle qu'exposée lors de la séance publique du 25.11.2020.