D'Lëtzebuerger Ekonomie wäert dëst Joer wéinst der Corona-Kris ëm 4 Prozent zeréckgaange sinn.

Nodeems de weltwäiten Handel am Fréijoer massiv agebrach ass an trotz enger historescher Rezessioun falen déi wirtschaftlech Previsioune vum Statec fir dëst Joer elo manner negativ aus wéi nach am Summer. Gläichzäiteg rechent een antëscht awer och mat enger manner staarker Reprise am nächste Joer. Dat geet aus hirer aktueller Note de conjoncture ervir, déi en Donneschdeg presentéiert gouf.

Statec iwwert d'Consommatioun - Reportage Maxime Gillen

Fir Lëtzebuerg huet ee beim Statec zwee extrem Zenarioen ausgeschafft. Een, wann et extra gutt leeft a keng weider gréisser Infektiounswell kënnt an een, wa genau dat geschitt a mir esouguer erëm missten an e komplette Lockdown goen. Um Enn wäert d'Wourecht iergendwou dotëscht leien – domat rechent een op d'mannst emol beim Statec. Fir 2020 geet een hei vun engem Réckgang beim PIB tëscht 3,5 a 4,5 Prozent aus. 2021 géif et wuel erëm eng Croissance ginn, ma déi kéint awer tëscht Minus 0,5 a 4 Prozent leien.

Allgemeng huet ee seng Previsioune beim Statec awer no uewe revidéiert, wéi de Ferdy Adam vum Statec erkläert.

De Ferdy Adam vum Statec (1)

"Lëtzebuerg ass besser aus där Kris erauskomm. Dat hate mir zum Deel antizipéiert um Aarbechtsmaart. Um PIB ware mir relativ pessimistesch. Do hu mir jo och eis elo verbessert en termes de croissance. Mir si sécherlech eent vun deene Länner, wat, wat d'Repercussiounen ubelaangt, ech géif esouguer soen och op gesondheetlechem Plang, mä awer och op wirtschaftlechem Plang, wou mir awer relativ gutt aus där Kris – esou wéi et elo mol ausgesäit – erauskommen."

Wat d'Staatsfinanzen ugeet, erwaart ee sech beim Statec e Réckgang bei de Recettë fir dëst Joer vu ronn 2 Prozent. Gläichzäiteg geet een awer och dovun aus, dass dee schonn d'nächst Joer erëm kéint ausgeglach ginn, mat Previsioune vun enger Hausse tëscht 2 a 5 Prozent, jee nodeem, wéi schlëmm d'Corona-Kris am Wanter wäert sinn.

De Ferdy Adam vum Statec (2)

"Lëtzebuerg huet ëmmer gesond Staatsfinanze gehat, eng kleng Dette. Deen Defizit vu Minus 5 Prozent, wéi mir en elo virausgesinn, misst sech am Joer 21 schonn zum groussen Deel resorbéieren. Mir rechne mat engem Defizit fir 21 tëscht 0 a Minus 2 Prozent. Lëtzebuerg kann dat vum Point de Vue vun de Staatsfinanzen absolut verkraaften."

Am Verglach mat deem massiven Abroch vun der Wirtschaft ass de Chômage bis ewell nëmme moderat geklommen. Déi Europäesch Kommissioun geet dovun aus, dass den Emploi an der Eurozon 2020 insgesamt ëm 2 Prozent wäert zeréckgoen, ma dass d'Hausse vum Chômagetaux sech géif a Grenzen halen. Nächst Joer par konter géif dann den Emploi sech erëm erhuelen, wärend de Chômage weider géif klammen.

Lëtzebuerg ass iwwerdeems dat eenzegt Land an der Eurozon, bei deem d'Kommissioun net dovun ausgeet, dass den Emploi dëst Joer zeréckgeet. Dat virop well vill Secteuren hei am Land besser ewechkomm wieren, respektiv, well grad wichteg Secteuren, wéi dee vun de Finanzen, op Mesurë wéi den Teletravail konnt zeréckgräifen an esou relativ gutt konnt weiderschaffen. De Statec geet fir Lëtzebuerg vun engem Chômagetaux fir 2020 vu 6,4 Prozent aus.