Et gëtt dann och e gesetzleche Kader fir Wunngemeinschafte geschaf. Déi parlamentaresch Logementskommissioun huet sech mat deem Sujet beschäftegt.

Donieft goung et ëm d'Verlängerung vun enger Corona-Moossnam. Et gëtt och iwwert de Januar eraus verbueden, fir de Loyer an d'Luucht ze setzen.

Logementskommissioun / De Reportage vum Dany Rasqué

Déi Lénk schléit an enger Gesetzpropositioun vir d'Moossnam ëm 12 Méint ze verlängeren. Et läit awer och e Gesetzprojet vun der Regierung um Dësch an deem, mat deem sech d'Kommissioun beschäftegt huet an dodra geet Rieds vun enger Verlängerung vu 6 Méint, wéi de sozialisteschen Deputéierten Yves Cruchten seet.

"Et gesäit esou aus, wéi wa mer d'Afréieren vun de Loyeren emol fir 6 Méint decidéieren. Mir hunn eis awer d'Wuert gi, wa mer dat esou maachen, da géife mer eis am Mee nach eng Kéier Rendezvous ginn, fir de Point ze maachen, ob déi Mesure eventuell nach eng Kéier sollt verlängert ginn oder net."

E Punkt iwwert dee méi laang diskutéiert gouf war den Artikel 1 aus dem Bail à loyer - Gesetz, dat rezent deposéiert gouf.
Dodra geet et drëm fir och zu Lëtzebuerg d'Notioun vun der Colocatioun anzeféieren.

"Mir haten eigentlech nach keng Gesetzgebung fir Leit, déi Wunngemeinschafte wëlle maachen. Et gëtt jo Leit, déi zu e puer, ouni datt se matenee Famill sinn, eng Wunneng wëlle lounen an deene schafe mer elo e gesetzleche Kader. Do geet d'Gesetz an déi richteg Richtung, et sinn nach vill kleng technesch Detailer ze klären.

Dorënner eng Rei juristesch Froen, fir déi sech ënnert anerem d'Piraten intresséiert hunn.

Marc Goergen: "Fir eis ass virun allem wichteg, datt jiddereen, deen dono an déi WG geet, juristesch ofgeséchert ass. Dofir hu mir ganz genau gefrot, wien dono eng Assurance ka maachen, fir déi Wunngemeinschaft, do muss de Minister nach emol mat den Assurance schwätzen, an déi aner Fro ass, wann eng Kéier muss den Dierwiechter kommen an deen hëlt Saache mat: wiem seng Saache sinn et?"

De Marc Lies vun der CSV ënnersträicht, datt seng Partei ganz kloer zu de Wunngemeinschafte steet, e betount awer, datt muss en Ënnerscheed gemeet ginn, zu deem kommerzielle Marché ronderëm d'Colocatioun.

"Dee Problem dee besteet schonn an dofir ass et gutt, datt d'Gesetz iwwert de Bail à loyer ugepasst gëtt an datt dann och muss kontrolléiert ginn, wat de capital investi ugeet. Bei deene Locatiounen, déi mer hautdesdaags gesinn fir en Zëmmer vun 10 Metercarré, wann een do 700, 800 Euro oder méi muss bezuelen, mengen ech, da si mer bei Präisser vu 70 oder 80 Euro de Metercarré an dat kann et definitiv net sinn."

D'CSV géif et dann och begréissen wa géif transparent Regëster gefouert ginn, wien a wéi engem Zëmmer logéiert ass. Dat géif och de Gemengen d'Aarbecht méi einfach maachen, esou den Deputé-maire vun Hesper.