De Pensiounsfong géif a Firmen investéieren, déi de Klimawandel unheizen an inkompatibel mat der Politik vun der Regierung wieren, sou de Marc Baum.

Mam Pensiounsfong, mä och mam Zukunftsfong gi riseg Investitioune gemaach, déi zum Deel an Aktivitéite fléissen, déi d’Ëmwelt zerstéieren, Mënscherechter verletzen an zu sozialer Ausbeutung féieren.

"Entreprisen, déi zum Beispill mat Gewalt géint lokal Populatioune virginn, déi Kanneraarbecht oder Ausbeutung dulden oder bewosst Ëmweltkatastrophe produzéieren. An dat natierlech an éischter Linn an den Entwécklungslänner, do wou d'Anhale vu Standarden aus ganz ville Grënn net kann assuréiert ginn an d'Multinationallen an Impunitéit kënnen handelen."

Et gëtt héich Zäit, datt d’Chamber sech deem Sujet seriö unhëlt. Dat huet den Deputéierte vun déi Lénk Marc Baum en Donneschdeg an der Chamber an enger Interventioun betount.

De Pensiounsfong géif a Firmen investéieren, déi de Klimawandel unheizen an inkompatibel mat der Politik vun der Regierung wieren, huet de Marc Baum kritiséiert. An Zäite vum Paräisser Klimaaccord kéint et net sinn, datt a fossil Energien investéiert gëtt:

"Et kann een dach net de Leit vermëttelen, datt si an hirem Alldag sollen aktive Klimaschutz bedreiwen, lo deemnächst eng CO2-Steier solle bezuelen a gläichzäiteg ginn hir Pensiounen a Firme wéi Shell, Total, oder BP investéiert. Dat ass en eklatante Widdersproch."

Extrait Marc Baum

De Marc Baum huet vun Inkoherenz geschwat an och nach e weidert Beispill genannt: D'Regierung wier géint d'Nuklearenergie, d'staatlech Fonge géifen awer an dee Secteur investéieren.

De Charles Margue vun déi Gréng huet an deem Kontext betount, datt eng Analyse vum gesetzleche Kader gemaach soll ginn, fir ze klären, ob de Fong generell Exklusioune vu ganze Secteure kéint maachen. Dat géif och en Zeeche sëtzen, datt de Staat seng Responsabilitéit als Investisseur konsequent géif huelen. Den DP Deputéierten André Bauler huet betount, datt  d'Nohaltegkeet vun den Investissementer eng Prioritéit fir d'Investitiouns-Strategie misst hunn, mee dat wier net déi eenzeg Prioritéit: 

"Dës Fongen hunn eng Responsabilitéit vis-à-vis vum Steierzueler, respektiv vis-à-vis vun deenen, déi verséchert sinn. Si dierfen also net eesäiteg ausgeriicht sinn a sech net op eng Uni- oder Bidimensionalitéit begrenze loossen."

Den André Bauler

Donieft war et d'Kritik vun déi Lénk, datt et keng Harmoniséierung tëscht béide Fonge gëtt. Den Zukunftspak investéiert a 25 Entreprisen, déi beim Pensiounsfong op der schwaarzer Lëscht stinn.

Dem Marc Baum no missten Investitiounen an déi lokal a regional Wirtschaft afléissen an och an de Logement. De Pensiounsfong géing dat momentan scho maachen, allerdéngs just geréng a falsch orientéiert. De Gilles Roth vun der CSV huet verlaangt, datt d'Gesetz esou geännert misst ginn, datt och en Deel vun de Sue vum Zukunftsfong an de Logement investéiert gëtt:

"Dat kann direkt awer och indirekt sinn, iwwert de Wee vun enger Kapitalbedeelegung an der nationaler Wunnengsbaugesellschaft, der SNHB. Dat kann iwwert eng Kapitalerhéijung gemaach ginn. Dat soll och fir den Zukunftsfong gemaach ginn."

Extrait Gilles Roth

Den DP-Deputéierten André Bauler huet betount, datt ee méi streng Krittäre bräicht, fir den Ziler vun nohalteger Gestioun vun ëffentleche Finanzen méi no ze kommen. Nieft der nohalteger a sozialer Responsabilitéit géif et awer och eng wirtschaftlech ginn, huet den André Bauler nach ënnerstrach.

Am Kader vun der Debatt en Donneschdeg an der Chamber huet d'Ëmweltorganisatioun Greenpeace d'Deputéiert virun der Entrée vum Cercle Cité opgefuerdert, sech fir en nohaltege Pensiounsfong anzesetzen.