Dat huet den Dr Gérard Schockmel am RTL-Interview iwwert déi nei Coronavirus-Mutatioun gesot.

Dr Schockmel iwwer Corona-Vaccin / Rep. Tim Morizet

Déi brittesch Variant vum Coronavirus géif scho méi laang zu Lëtzebuerg existéieren, ma wier elo réischt kierzlech detektéiert ginn, esou den Dr. Gérard Schockmel, Spezialist fir Infektiounskrankheete vun den Hôpitaux Robert Schuman, am RTL-Interview. Och wann nei Etüde géifen drop hiweisen, datt d'Mutatioun net esou ustiechend wier ewéi am Ufank geduecht, wier d'Variant net ze ënnerschätzen.

Vu 70% méi ustiechen erof op 50%. Net ze ënnerschätzen. Ma et gi verschidde Mutatiounen, esou de Spezialist.

Déi Variant vum Virus a Groussbritannien, déi huet 23 Mutatiounen. Do sinn der och e puer dobäi, déi de Spike-Protein betreffen. Méi transmissibel heescht, datt méi Leit sech ustiechen. Wa méi Leit sech ustiechen, hu mer méi Leit, déi krank ginn, méi Leit déi schwéier krank ginn a méi leit déi stierwen. Dat ass warscheinlech d'Zukunft beim Coronavirus. Et sinn nämlech déi Souchen, déi méi ustiechend sinn, déi fréier oder spéider wäerten dominéieren.“

Et wier een awer relativ sécher, datt de Vaccin d'Wierksamkeet behält. Deen dee geimpft géif ginn, géif verschidden Antikierper géint verschidde Partië vum sougenannte Spike-Protein opbauen. Genee Etüde missten dat awer nach eng Kéier bestätegen, esou de Lëtzebuerger Spezialist. Ma wéi immun ass een no der éischter Impfung vun de bekannte Vaccinen?

Dat hänkt vum Vaccin of. Beim Pfizer/Biontech-Impfstoff huet een no enger Injektioun 12 Deeg duerno eng Protektioun vun ëm déi 53%. A Groussbritannien baséiert ee sech awer virun allem op den AstraZeneca-Vaccin vun Oxford. Do hu se gewisen, datt an enger gewëssener Partie vu Leit schonn no 3 Wochen eng Protektioun vun 73% areecht gouf. Dat ass natierlech formidabel.“

Ma hei géif a verschiddene Fäll och kee groussen Ënnerscheed an der finaler Effikassitéit no der 2. Vaccinatioun entstoen, ewéi et zum Beispill beim Impfstoff vu Pfizer oder Moderna de Fall wier. Een Ënnerscheed bei den Niewewierkungen tëscht de verschiddene Vaccine géif awer existéieren, esou den Dr. Schockmel.

D'Niewewierkunge bei 1. Injektioun vum Pfizer-Produit an deem vu Moderna si quasi identesch. Mee no der 2. Dosis war e groussen Ënnerscheed ze gesinn. Et ware 5 Mol méi Leit, déi no der 2. Injektioun vum Moderna-Impfstoff eng Niewewierkung, den 2. Dag virun allem, haten. Dat heescht se ware midd, haten de Kappwéi. Se hate Schwieregkeeten hirer normaler Routine nozegoen.“

Dat war bei ëm déi 15% vun de geteste Persounen de Fall. Soss läit de Pourcentage bei 2-3%. Gréisser Niewewierkungen hätten et während den Etüde keng ginn.

Bei deenen, déi an der Studie-Gruppe vu Moderna waren, hate se 30 schwéier Covid-Fäll. 30 Persounen, déi effektiv eng schwéier Erkrankung duerch Covid entwéckelt hunn. Allen 30 waren awer am Placebo-Grupp. Keng Persoun war am Moderna Grupp, déi den Impfstoff kritt huet. Bei Pfizer/Biontech hate se puer manner schwéier Krankheetsverleef. Do waren et 10 Persounen. Vun deenen 10 waren 9 Persounen aus der Placebo-Grupp an eng Persoun war am Impfstoff-Grupp.“

Et wier iwwerdeems wichteg, datt verschidden Impfstoffer an eiser Societéit agesat ginn, esou nach den Dr. Schockmel, Spezialist fir Infektiounskrankheeten. Réischt da géif ee gewuer ginn, wat den detailléierte Profil vun all Vaccin ass a bei wéi eng Persoun wéi ee Vaccin am Beschte passt.