De Mann, dee weder Drogen nach Alkohol konsuméiert hat, gouf festgeholl a koum virun den Untersuchungsriichter.

E Mëttwoch den Owend um kuerz virun 20 Auer koum et virun der Stater Gare zu engem éischter aussergewéinlechen Virfall. Éischten Erkenntnisser no stoung e Chauffeur op der Place de la Gare bei enger rouder Luucht, wéi op eemol de Réckgang ageluecht gouf an de Chauffeur ouni ersiichtleche Grond hannerzeg géint en aneren Auto gefuer ass.

Dono ass hien nees no vir gefuer, ass duerch déi rout Luucht op d'Tramspist gefuer, dat a Richtung Gare. Hei ass hie géint eng Glasmauer vun der Hal vun der Gare gerannt an ass stoe bliwwen.

E puer Foussgänger, déi um Parvis vun der Gare ënnerwee waren, hu missten dem Auto auswäichen, ma glécklecherweis gouf kee blesséiert. De Chauffeur selwer gouf nach op der Plaz vun der Police festgeholl. Den Alkohol- an Drogentest sinn negativ ausgefall.

De Parquet gouf informéiert an huet ordonéiert, datt de presuméierte Chauffeur en Donneschdeg de Muere virun den Untersuchungsriichter koum.