Nieft der drëtter Phas vum Large-Scale-Testing waren och d'Schnelltester en Dënschdeg de Moien en Thema an der Chamber.

Déi drëtt Phas vum Large-Scale-Testing géing net a Fro gestallt ginn, esou de Kommissiounspresident Mars Di Bartolomeo. Ma d'Deputéiert ware sech en Dënschdeg de Moien an der Santéskommissioun awer eens, dass et nëmme funktionéiert, wann och genuch Leit matmaachen. An den éischten zwou Phase vum Large-Scale-Testing hunn een Drëttel vun de Leit hir Invitatioun och tatsächlech wouergeholl. Hei ass also nach Loft no uewen.

Et hätt ee missen aus den zwou viregte Phase léieren an zum Beispill mat enger Etüd erausfannen, wéi eng Leit ee bis ewell net erreeche konnt, esou den CSV-Deputéierte Claude Wiseler. Dës Donnéeë géingen den Ament feelen an esou eng Etüd wier och net virgesinn, regrettéiert d'Oppositioun.

Et wier grondsätzlech e gutt Konzept, an déi Lénk hunn déi éischt zwou Phase vum Large-Scale dowéinst och matgestëmmt. Ma d'Konzept baséiert awer virun allem op dem Traçage vun de Risikokontakter, esou kënne jo da weider Infektioune verhënnert ginn. Et hätt een awer zum Beispill am Hierscht gesinn, dass den Tracing net nokënnt, wann d'Neiinfektioune séier a signifikant klammen. Dowéinst wier et elo un der Zäit, fir d'Strategie unzepassen an och méi Flexibilitéit virzegesinn, esou den Deputéierte vun déi Lénk Marc Baum.

Extrait Marc Baum

D'Regierung huet an der Kommissioun verséchert, dass d'Tracing-Ekippe méi Kapazitéite kruten. Et kéinte mëttlerweil bis zu 400 nei Fäll den Dag noverfollegt ginn. Den Ament sinn d'Neiinfektioune jo nach méi niddreg, ma et misst trotzdeem scho méi virausgekuckt ginn, fir op eng eventuell nei Well kënnen ze reagéieren. An deem Fall sollt de Large-Scale-Testing, dee jo och vill Kapazitéite kascht, iwwerduecht ginn.

64 Milliounen Euro soll déi drëtt Phas kaschten. Fir den ADR-Deputéierte Jeff Engelen misst een iwwerpréiwen, ob sech de Large-Scale-Testing iwwerhaapt nach lount. An der Chamberkommissioun wier och ugeschwat ginn, ob een am Large-Scale net och Schnelltester kéint asetzen. Fir de Jeff Engelen misst ee sech op eng Strategie konzentréieren an d'Schnelltester net parallel zum Large-Scale-Testing, dee jo den Ament mat de PCR-Tester funktionéiert, lafe loossen.

Et stéingen a puncto Schnellltester nach eng Partie Froen op, esou de Kommissiounspresident Mars Di Bartolomeo vun der LSAP.

Extrait Mars Di Bartolomeo

Eng Millioun vun esou Schnelltester wiere schonn do, et géing also keng Penurie ginn. Ma den Detail, wéi a wou dës solle benotzt ginn, muss awer nach gutt iwwerluecht ginn. Mat Schnelltester sinn nämlech Antigen-Tester gemengt, déi nach ëmmer vun engem Professionnel de santé mussen duerchgefouert ginn. Wann esou Tester also zum Beispill an den Apdikte kënne verkaf ginn, bleift d'Fro nach op, wou se solle gemaach ginn. An der Apdikt selwer wier dat net ëmmer méiglech. Et wéilt een och verhënneren, dass d'Apdikten dann zu enger Zort Hotspot ginn. Ausserdeem muss och op eng gutt Informatiounscampagne gesat ginn, esou de Mars Di Bartolomeo, fir dass esou Schnelltester net eng falsch Sécherheet bréngen. Et wier nach ëmmer eng Mëschung tëscht de Gestes barrière, dem Large-Scale an den neie Schnelltester, déi muss envisagéiert ginn, fir aus dëser Kris erauszekommen.