Am Prozess goung et ëm 842 Luxusaueren am Wäert vu ronn 18 Milliounen Euro, déi bei 13 Perquisitiounen am Joer 2011 séchergestallt goufen.

2 Joer Prisong mat integralem Sursis, grad wéi eng Geldstrof vun 250.000 Euro an d'Confisquéiere vun enger gudder Partie Aueren. Fir Aueren, déi net kënne saiséiert ginn, gëtt eng Geldstrof vu jeeweils 20.000 Euro fälleg.

Dat ass d'Urteel an éischter Instanz, dat den Donneschdeg de Moie gesprach gouf, am Prozess géint de Baupromoteur a Sport-Investisseur Flavio Becca. Him gouf Blanchiment a Mëssbrauch vu Firmegelder virgeworf.

Méi genee goung et am Prozess ëm iwwer 800 Luxus-Aueren am Wäert vu ronn 18 Milliounen Euro, déi bei 13 Perquisitiounen am Joer 2011 séchergestallt goufen.

De Gros dovunner war iwwert verschidden Entreprisë kaaft ginn. Dobäi hätte se awer näischt mam Objektiv vun de Bau-Societéiten ze dinn, mä wieren deelweis als Investissementer geduecht gewiescht, sou de Flavio Becca wärend dem Prozess Enn Januar.

Souwuel de Grond wéi och d'Manéier vun den Uschafunge stoungen awer am Zentrum vun de Verhandlungen. De Parquet hat nach 3,5 Joer Prisong mat méiglechem Sursis gefrot.

De Flavio Becca war net selwer beim Urteel dobäi. Wéi et vu sengen Affekoten heescht, hätt een decidéiert, an Appell ze goen.