D’Staatsbeamtegewerkschaft CGFP huet d’Conciliatiounsprozedur mam Educatiounsministère virleefeg op Äis geluecht.

D'CGFP schreift um Dënschdeg de Moien, eng Rei Fuerderunge vun der Gewerkschaft wieren ëmgesat ginn. An der Haaptsaach huet dem Educatiounsminister Claude Meisch jo säin ëmstriddene Gesetzprojet zeréckgezunn, mat deem virgesi war, datt a 4 spezialiséierte Lycéeën och Leit, déi net Staatsbeamte sinn, kéinten Direkter ginn. An anere Wieder: Leit aus dem Privatsecteur kréie weiderhi keen Zougank fir Spëtzeposten am Schoulwiesen.

D’CGFP schreift weider, domadder wier d'Saach net gedoen. Elo missten déi entspriechend Gesetzprojeten zesumme mat den zoustännege Fachverbänn vun der CGFP iwwerschafft ginn.

De Grond, firwat d'Staatsbeamtegewerkschaft d'Conciliatioun och net ganz stoppt, wiere "Meenungsverschiddenheeten" mam Sportminister Dan Kersch. Et wier nämlech nach net gewosst, ob de Minister op d'Fuerderung ageet, de Poste vu Sportskommissär fir Sportsproffen ze reservéieren.