Iwwer 4 Méint sinn et hier, dass den Horeca-Secteur scho muss zou hunn. Elo gëtt et en éischte Liichtbléck, mat der Ouverture vun den Terrassen.

Tëscht moies 6 an owes 18 Auer däerfen d’Restauranten an d’Caféë maximal zwee Leit op engem Dësch zerwéieren, ausser se kommen aus engem Stot.

Impressiounen aus der Stad vum Patrick Greis

Och wann d’Wieder op d’mannst op dësem 1. Dag emol net wierklech matspillt, wier et e Schratt an déi richteg Richtung, krute mer vun der Horesca gesot. D’Federatioun vun de Cafetieren, Restaurateuren an Hoteliere stéiert sech awer un den Auerzäiten an hätt sech virun allem eng Ouverture bis op d’mannst 20 Auer gewënscht, dëst och mam Argument, dass elo de Risk géif bestoen, dass d'Leit um 18 Auer decidéieren, dass se sech Doheem treffen, fir nach eppes ze drénken, wou d'sanitär Reegele vill manner kontrolléiert kënne ginn.

De François Koepp

Formell gesinn ass et iwwregens weiderhin eng administrativ Fermeture vum Secteur. Dofir ginn Hëllefen, wéi de Chômage partiel, och weiderhin ausbezuelt.

D’Horesca mécht e klenge Rappell vun de Reegelen, déi ee muss respektéieren:

Just Sëtzplaze fir d‘Clientë sinn erlaabt. Nëmmen um Dësch däerf consomméiert ginn an d’Vente à emporter bleift weider erlaabt. Maximal zwee Leit pro Dësch sinn erlaabt oder Leit aus engem Stot. D‘Dëscher mussen annerhallwe Meter vuneneen ewechstoen oder mat enger Barrière oder Separatioun getrennt sinn. D’Personal muss e Mask unhunn an och de Client, wann en net sëtzt.

D’Horesca preziséiert, datt d’Terrasse vun Natur aus lëfteg a gutt belëft sinn. Wann op engem Dësch méi wéi zwee Leit sëtzen, muss de Gerant oder Patron froen, ob déi Leit zesumme wunnen. En däerf een awer keng Identitéit kontrolléieren.

De Client däerf an de Restaurant oder de Café eran, awer just fir op d’Toilette ze goen oder eng Commande opzeginn. Net fir eppes z’iessen oder ze drénken.