E Mëttwoch de Moie kuerz virun 10 Auer ass de CGDIS geruff ginn, well zu Schengen an der Bachergaass en Auto an der Musel gemellt gouf.

Nieft de Pompjeeë vu Réimech a Schengen, gouf och nach d'Diddelenger Ambulanz op d'Plaz geruff, grad ewéi de Samu an de "Groupe de sauvetage aquatique". Eisen Informatiounen no ass och d'Police technique op der Plaz.

Op Nofro hin huet d'Police bestätegt, dass wuel kee Mënsch zu Schued komm ass. Et gëtt awer eng Enquête an d'Weeër geleet, fir erauszefannen, wat et mat deem Auto op sech huet.

2 Bränn - Keng Blesséierter

Géint 8.45 Auer gouf et um Kackerterhaff e gréisseren Asaz wéinst engem Brand, deen op en elektresche Problem zeréckzeféiere war. Pompjeeën aus 5 Zentere koumen an den Asaz (Mutfert, Sandweiler, Nidderaanwen, Hesper a Lëtzebuerg). Et blouf beim Materialschued.

Géint 10.30 Auer da stoung um Sennengerbierg (Parishaff) e Container a Brand. D'Pompjeeë vun Nidderaanwen hu sech ëm d'Läschaarbechte gekëmmert. Et gouf kee blesséiert.