Den CSV-Deputéierten trëtt un der Spëtzt vun enger Ekipp un, fir um Kongress de 24. Abrëll den neie Parteipresident vun der CSV ze ginn.

Claude Wiseler Kandidat fir CSV-Presidence

De Claude Wiseler huet en Donneschdeg de Moien dat offiziell confirméiert, wat mir Iech scho gemellt haten. Den CSV-Deputéierten trëtt un der Spëtzt vun enger Ekipp un, fir um Kongress de 24. Abrëll den neie Parteipresident vun der Chrëschtlechsozialer Vollekspartei ze ginn. Hien hätt an de leschte Wochen an Deeg vill Gespréicher mat Leit gefouert a wéilt mat senger Ekipp zesumme Rou an d'Partei bréngen an derfir suergen, datt Friktiounen tëscht Partei a Fraktioun der Vergaangenheet ugehéieren, dat sot den Zentrumsdeputéierten am RTL-Interview. Kandidat fir de Poste vum Generalsekretär ass den Europadeputéierte Christophe Hansen, dee parallel zu sengem Engagement un der Parteispëtzt heiheem am Europaparlament bleiwe wäert. Den Deputéierte Paul Galles an d'Gemengeconseillère vu Suessem Anne Logelin trieden un, fir Vizepresident ze ginn.

Mir brauchen elo Rou an Harmonie an eise Reien an datt d'Partei an d'Fraktioun zesummeschaffen, sou wéi se dat sollen, huet de Claude Wiseler betount, deen, eegenen Aussoen no, de 24. Abrëll e Schlussstréch ënnert dat zéie wëll, wat geschitt ass.

Vill Leit wiere sech bewosst ginn, datt elo e Ruck duerch d'Partei goe muss, fir datt d'CSV sech déi nächst zwee Joer sou organiséiere kann, fir d'Vertraue vun de Leit a sech an an hir Politik zeréckzekréien.

De Claude Wiseler wëll dem Kongress och eng Statutenännerung proposéieren, fir d'Spëtzeposte bei der CSV duebel ze besetzen. Deemno géife sech d'Martine Hansen an de Gilles Roth d'Presidence vun der Fraktioun deelen. D'Stater Conseillère Elisabeth Margue géif Presidentin adjointe an d'Stéphanie Weydert, Schäffen an der Gemeng Rouspert-Mompech géif un der Säit vum Christophe Hansen Generalsekretärin adjointe ginn.

De konservative Politiker huet en Donneschdeg de Moien am RTL-Interview betount, säin Engagement als Parteipresident hätt näischt mat enger Spëtzekandidatur fir déi nächst Chamberwalen ze dinn. Hie géif elo seng Aarbecht als Parteipresident maachen a wier wierklech net Demandeur, fir Spëtzekandidat ze sinn. Vill méi géif hien zesumme mat der Partei no neie Modeller fir d'Spëtzekandidatur sichen.

Theoretesch ass et net ausgeschloss, datt nach eng Géigekandidatur fir d'Spëtzeposte bei der CSV erakënnt. Den Delai leeft nach bis e Freideg.

De Protagonisten un der zukünfteger CSV-Spëtzt ass eppes ganz wichteg: si wëllen als Equipe eriwwer kommen, méi modern nach: als Team. ''Mir brauche wierklech e Mateneen vun der Basis bis un d'Spëtzt.'' Seet d'CSV-Fraktiounspresidentin Martine Hansen. Wann d'Partei op de Wee geet, déi wichteg Posten duebel ze besetzen, kéint een dat och an der Chamber maachen.

''Gëschter hat mir kuerzfristeg eng Fraktiounssëtzung aberuff. Dunn hunn ech do den Deputéierten eng Duebelspëtzt virgeschloen: de Gilles Roth an ech zesummen. Dat ass eestëmmeg ugeholl ginn an ech fannen, dass dat een immens gutt Zeechen ass. Et war eng Opbrochstëmmung.''

Kandidat fir de Poste vum Generalsekretär ass den Europadeputéierte Christophe Hansen, dee parallel zu sengem Engagement un der Parteispëtzt heiheem am Europaparlament bleiwe wäert.

''Vum Opwand hir ass et natierlech eng Charge méi, mä wann ee sech gutt organiséiert kritt een dat och hin.''

Ënnerstëtzung kritt de potentielle Generalsekretär vun der Stéphanie Weydert, bis ewell Vize-Presidentin a Schäffin an der Gemeng Rouspert-Mompech.

Dat Personal soll d'CSV lues a lues prett maache fir d'Nationalwalen 2023. Mä ass an dëser Equipe och schonn de Spëtzekandidat, d'-Kandidatin? De Claude Wiseler wëll definitiv net. Deenen anere Politiker ass et nach ze fréi fir déi Diskussiounen, ma de Christophe Hansen seet och dat hei.

''Et kann een nëmme gutt national Politik maachen, wann een eppes vu Gemengepolitik an och vun internationaler Politik versteet. Et kann een nëmme gutt Europapolitik maachen, wann een sech ëm déi national Politik këmmert, soss kann een och d'Interêten vu Lëtzebuerg zu Bréissel net verdeedegen. Generell sinn déi Erfarungen déi een op verschiddene Niveaue gesammelt huet, och ganz hëllefräich.'' Zu de Changementer un der Parteispëtzt gehéieren och nei Gesiichter um Niveau vun de Bezierker. Och déi misst een zum Team zielen, sou de Claude Wiseler. De Jeff Boonen soll neie Bezierkspresident am Norde ginn an de Poste vum Christophe Hansen iwwerhuelen. De Vincent Reding trëtt un, fir Bezierkspresident am Zentrum ze ginn. Am Osten an am Norde sollen et de Max Hengel an de Jean-Marie Wirth ginn, iwwerdeems den Thierry Schuman als Tresorier kandidéiert.