Um Dënschdegmoie koum et tëscht der Vugelsmillen an dem Mëllerdall zu engem Accident, bei deem e Camion gekippt ass.

D'Schwaarz Iernz am Mëllerdall ass verknascht: E Camion, dee Piff gelueden hat, ass en Dënschdeg de Moien um CR121 ëmgekippt. Fir d'Éischt hat de CGDIS vun ongeféier 15.000 Liter Piff a puer honnert Liter Sprit geschwat, déi erausgelaf sinn. Am fréien Owend gouf déi Zuel awer op ronn 30.000 Liter erhéicht. D'Pompjeeë sinn am Asaz, fir ze verhënneren, datt sech d'Verschmotzung verbreet an hunn zwou Barrièren an der Baach installéiert an e Sytème d'oxygénatioun an d'Waasser gesat.

Déi Charge vum Camion, déi nach net ausgelaf war, gouf ëmgelueden, éier een de Camion an d'Remorque konnt gebuerge ginn.

De Chauffeur gouf beim Accident blesséiert a vun de Rettungsekippen en charge geholl.

Op d'Plaz geruff goufen d'Pompjeeë vu Beefort, Iechternach a Mäertert, d'Ambulanz vun Iechternach, de Samu, de Groupe de sauvetage aquatique grad ewéi de Groupe risques chimiques, biologiques, radiologiques et nucléaires (CBRN). Eng 30 Pompjeeë waren de ganzen Dag am Asaz a goufen och vun der Administration de la Gestion des Eaux, der Forstverwaltung, der Police, dem Ponts et Chaussées an der Entreprise Gru-Lux ënnerstëtzt. Den Dispositiv, dee géint Pollutioun ukämpft, wäert wuel nach bis e Mëttwoch am Asaz sinn.

D'Streck ass viraussiichtlech bis e Mëttwoch fir den Trafic gespaart. Eng Deviatioun geet iwwer Konsdref. Donieft ass den CR364 Bäerdref - Vugelsmillen och elo fir den Trafic gespaart, mellt den ACL um 13.13 Auer.

RTL

© Domingos Oliveira / RTL