De Staat huet iwwerdeems eng ronn 2,6 Milliounen Euro un Dotatiounen un déi 7 Parteien ausbezuelt.

Déi meescht Dotatioune krut d'CSV mat ronn 708.000 Euro, iwwerdeem d'DP ronn 470.000 Euro krut, déi Gréng 425.000 an d'LSAP ronn 385.000. Dat geet aus dem Rapport vun der Cour des Comptes ervir, deen d'Deputéiert vun den zwou zoustännege Chamberkommissioune presentéiert kruten.

Och déi méi kleng Fraktiounen kruten Dotatiounen: d'ADR 255.000, déi Lénk ronn 172.000 an d'Piratepartei eng 193.000.

Am Rapport vun der Cour des Comptes goufen et zwou gréisser Observatiounen: engersäits iwwert d'sozial Cotisatiounen, déi de fréieren CSV-President Engel zeréckbezuelt krut an anersäits iwwert d'Vente vun engem "Foodtruck" vun der Piratepartei un ee vun de Memberen vun dëser Partei, deen dem Rapport no gréisser Zomme bezuelt hätt, fir Publicitéit fir d'Piraten ze maachen.

Fir vun de staatleche Subventiounen ze profitéieren, muss dem Parteiefinanzéierungsgesetz no d'Partei komplett Lëschten an alle 4 Bezierker presentéieren an op d'mannst 2% vun de Stëmmen an der nationaler Moyenne op sech verbucht hunn.

Déi rezent Affär ëm de Kontrakt tëscht der ASBL CSV Frëndeskrees an dem Ex-President Engel war den Hannergrond vun den Iwwerleeungen, fir de Parteien eng juristesch Basis ze ginn; entspriechend technesch Preparatiouns-Reuniounen hunn dann och ewell ugefaangen, fir datt sech op deem Punkt kollektiv eens gesat gëtt. Verschiddenen Deputéierten no missten dann och d'Partei-ASBLen opgeléist ginn, soubal d'Parteien och e juristesche Statut hätten.

Vum nächste Joer u wëll d'Cour des Comptes iwwerdeems méi strikt d'Parteien-Finanze kontrolléieren, notamment ginn net nëmmen d'Donen un d'Parteie selwer consideréiert, mee och d'Suen, déi zum Beispill u parteino Strukturen wéi ASBLe fléissen.