D'Etüd, déi am Koalitiounsaccord virgesi war, wier en decisive Schratt um Wee zu enger nationaler Gesetzgebung.

Initiativ Devoir de Vigilance - Rep. Claudia Kollwelter

E nationaalt Gesetz, wat d'Mënscherechter an den Entreprisë regléiert, ass fundéiert a machbar. Dat seet d'Initiativ vum Devoir de Vigilance a bezitt sech op eng Etüd, déi rezent publizéiert gouf.

D'Studie, déi am Koalitiounsaccord virgesi war, wier en decisive Schratt um Wee zu enger nationaler Gesetzgebung. D'Initiativ begréisst donieft och, datt en interministerielle Comité ënnert dem Ausseministère aberuff gouf. Eng réng fräiwëlleg Approche, wat d'Mënscherechter an den Entreprisë betrëfft, wier keng Optioun méi, et bräicht een e legale Kader.

De Jean-Louis Zeien vun der Initiativ huet donieft en Dënschdeg de Moien an der Reaktioun op d'Etüd betount, datt e legale Kader Avantagë fir d'Entreprisen a fir d'Land kéint hunn: "Eng Due-diligence kann den Entreprisen hëllefen, eng Plus-value ze schafen. Ka Méiglechkeeten identifizéieren, wéi Käschte kënne reduzéiert ginn. Dréit zu engem bessere Versteesdemech vu strategesche Mäert a Bezuchsquelle bäi. Stäerkt de Management an dréit dozou bäi, datt e bessere Risikomanagement ka virkommen."

Jean-Louis Zeien vun der Initiativ

Aus der Etüd géif och ervirgoen, datt et keng Beleeger ginn, datt duerch sou Gesetzer Acteuren aus dem Finanzsecteur éischter an aner Länner wéilte goen, wou et keng sou legal Kadere ginn, huet de Jean-Louis Zeien nach ënnerstrach.

RTL

© Claudia Kollwelter (RTL)

Eng réng fräiwëlleg Approche, wat d'Mënscherechter an den Entreprisë betrëfft, ass keng Optioun méi, mir brauchen e legale Kader. Dat ënnersträicht d'Initiativ vum Devoir de Vigilance, déi en Dënschdeg op eng rezent Etüd reagéiert hunn, déi vum Ausseministère an Optrag gi war. D'Etüd géif kloer weisen, datt en nationaalt Gesetz fundéiert a machbar wier, betount d'Initiativ. Si begréissen och, datt en interministerielle Comité ënnert dem Ausseministère aberuff gouf, et wier awer wichteg, datt déi sech en Zäit-Kader fixéiere géif.

An eisen Nopeschlänner géif proaktiv um Niveau vun de Mënscherechter an der Aarbechtswelt agéiert ginn a Lëtzebuerg misst sech an déi Dynamik mat abréngen. Fir op d'Thematik opmierksam ze maachen an hir Fuerderungen ze ënnersträichen, huet d'Initiativ vum Devoir de Viglinace haut eng Aktioun mat Postkaarte lancéiert, déi d'Leit ënnerschreiwen an un den Ausseminister Asselborn schécke sollen, fir datt op nationalem Niveau e Gesetz gestëmmt gëtt, fir ze garantéieren, datt d'Entreprisë mat Sëtz zu Lëtzebuerg d'Mënscherechter am Kader vun de Liwwerkette respektéieren.

Hei de komplette Communiqué als PDF!