D'Piraten hunn eng nei Spriecherin - um gréisstendeels digitale Landeskongress vun der Partei gouf d'Rebecca Lau op dee Poste gewielt.

Si krut 88 Prozent vun de Stëmmen an ersetzt domat d'Marie-Paule Dondelinger, déi nëmmen 23,5 Prozent vun de Stëmme krut - knapp 60 Prozent vun de Piraten hu géint si gestëmmt.

D'Marie-Paule Dondelinger koum ursprénglech vun der PiD, si war zanter 2019 Co-Spriecherin vun de Piraten. D'Rebecca Lau huet um RTL-Mikro iwwert hir politesch Prioritéite geschwat - hiert Resultat konnt déi jonk Politikerin nach net sou richteg gleewen. "Et ass alles nach ëmmer e bëssen irrealistesch fir mech, ech muss dat nach ëmmer verdauen, mee et ass vill besser, wéi ech geduecht hat, dat ass mol sécher. (...) Integratioun an Anti-Mobbing, respektiv Anti-Diskriminatioun, dat ass mer ganz wichteg, virun allem, well ech dat fréier a menger eegener Kandheet och erlieft hunn. An do wëll ech am meeschten drop schaffen."

D'Rebecca Lau ass elo Co-Spriecherin mam Starsky Flor, dee mat knapp 95 Prozent op sengem Poste confirméiert gouf.

Den Deputéierte Marc Goergen ass nach ëmmer Koordinator vun der Partei, säi Mandat leeft nach bis 2022 a stoung elo net zum Vott.

De Piraten-Generalsekretär Marc Goergen huet de Sven Clement als Spëtzekandidat fir d’Chamberwalen 2023 virgeschloen. De Betraffenen huet confirméiert sech schonn op d’Walen virzebereeden. Et wier awer nach ze fréi, offiziell Kandidaten festzeleeën.   ven Clement :

“Wann dat als Spëtzekandidat oder als Deel vun engem Team Piraten ass, beides ass fir mech vollkommen ok. Ech freeën mech op alle Fall schonn drop mat de Wielerinnen an Wieler dobaussen eis Iddien, eis Proposen ze diskutéieren an dann wierklech rëm an de Wettkampf vun den Iddien ze kommen an net an eng stuer Majoritéit-Oppositiounspolitik.”   Ronn 450 Memberen huet d’Piratepartei mëttlerweil. Den Undrang wier zanter der Pandemie geklommen, well munch Leit mat der Regierungspolitik net méi zefridde wieren. Dat géif un der Inkohärenz vu verschidde Mesuren leien.

Sven Clement:

“Et ginn dräi oder véier verschidden Definitiounen, wat e Schnelltest ass, wat e Selbsttest ass, wien dann lo wéini wou een däerf maachen. Da gëtt bemol dovun geschwat fir 35€ een kann an der Apdikt maachen fir an de Restaurant ze goen, wou een da säin Béier fir 2,40€ drénkt. Also iergendwou sinn déi Relatiounen net méi ginn.”

Wat hir Interessien ugeet, wëll d’Partei sech och an Zukunft trei bleiwen. Am Virdergrond stinn d’Wunnrecht fir Jiddereen, den Déiereschutz an d’Digitaliséierung mam Schwéierpunkt Dateschutz.