D'Ekippe vum CGDIS hunn an de leschte Stonnen dräi Bränn missten ausmaachen a ware bei dräi Accidenter am Asaz.

Am Lokale mellt de CGDIS e Brand e Sonndeg den Owend kuerz virun 23 Auer an der Lëtzebuerger Strooss zu Leideleng. D’Feier war am Keller vun engem Haus ausgebrach. D’Pompjeeën aus der Stad, vu Leideleng a Monnerech waren op der Plaz, et blouf beim Materialschued.

Géint 3 Auer huet et dann och an engem Haus zu Wallenduerf gebrannt, direkt un der Lëtzebuerger Grenz, déi aner Säit vun der Sauer.  Hei waren d’Pompjeeë vu Reisduerf a Konsdref  mat am Asaz. D'Ekippen aus Lëtzebuerg hunn hir däitsch Kolleegen op der Plaz ënnerstëtzt. De Brand war géint 6 Auer um Méindeg de Moie geläscht.

Kuerz virun 19 Auer hat dann nach eng Poubelle zu Baschelt gebrannt.

Da mellt de CGDIS nach e puer Accidenter. Kuerz no 17 Auer e Sonndeg ass tëscht Pëtschent/Weiler a Wuelessen a Motocyclist gefall. Dëse gouf liicht verwonnt, d'Rettungsekippe vu Pëtschent an Dikrech waren op der Plaz.

E bësse méi spéit krut zu Hasel an Auto e Cyclist ze paken, hei gouf eng Persoun liicht blesséiert. D'Ambulanze vu Beetebuerg a Weiler zum Tuer waren am Asaz.

Géint 20 Auer waren d'Ekippe vun Esch an Dippech am Asaz, nodeem en Automobilist zu Betteng op der Mess accidentéiert war, dat an der Route des Trois Cantons. Och hei gouf eng Fra liicht verwonnt, nodeems se mat hirem Gefier e puer Beem ze pake krut. Den Alkoholtest war positiv, de Permis gouf agezunn.