De Guardian Grupp bleift zu Lëtzebuerg, mä verlagert seng ganz Produktioun definitiv op säi Site zu Käerjeng.

D'Finanzkris 2008 an d'Coronapandemie hunn den amerikanesche Glasproduzent Guardian d'lescht Joer dozou bruecht, säi Standuert zu Diddeleng opzeginn. A säi Standuert zu Käerjeng wëll een awer weider investéieren. Dat huet d'Entreprise e Méindeg op enger Pressekonferenz ugekënnegt.

Guardian huet 17.000 Employéë weltwäit. 1981 koum d'Entreprise op Lëtzebuerg, fir hiren éischte Site baussent den USA opzebauen. Zanter 2016 ass Lëtzebuerg den europäeschen Haaptsëtz.

D'lescht Joer am Juni war d'Entreprise dat éischt industriellt Affer vum Covid. Déi Responsabel vu Guardian hätte gefaart, dass d'Glasproduktioun keng Zukunft zu Lëtzebuerg méi hätt, esou de Wirtschaftsminister Franz Fayot:

Et goufe scho virun der Covid-Pandemie Iwwerkapazitéiten an der Produktioun vu Flaachglas, esou dass d'Demande vu Flaachglas, haaptsächlech an der Bau- an Automobilbranche schwaach war a se ass nach méi staark zeréckgaange wärend der Covid-19-Pandemie.

Et wier scho méi laang am Gespréich gewiescht, de Site zu Diddeleng brooch ze leeën, notamment zanter der Finanzkris 2008. Duerch d'Pandemie ass déi definitiv Decisioun gefall, den Diddelenger Site zouzemaachen. Déi ganz Produktioun gouf op Käerjeng verluecht.

Zukunft vu Guardian / Rep. Nadine Kremer

Mä och dësen Uewe kënnt d'nächst Joer un d'Liewensenn. No laanger Iwwerleeung huet Guardian elo annoncéiert, dass si an dëse Site investéiere wëll. Et gëtt een neien Uewe gebaut, deen op d'mannst nach 15 bis 20 Joer funktionéiere soll. 2023 wier en asazbereet, erkläert de Guus Boekhoudt, Direkter vu Guardian Europa:

Dës moderniséiert Produktiounsanlag soll méi energieeffizient a méi ëmweltfrëndlech sinn. Den Energieverbrauch an d'Emissioun vun CO2 gëtt däitlech reduzéiert.

D'Produktioun bleift mat 600 Tonne Glas den Dag d'selwecht wéi bis elo. Mä den ekologesche Foussofdrock gëtt méi kleng. Et ginn 20 bis 30% manner CO2 ausgestouss.

Am Ganze wëll Guardian eng Zomm am zweestellege Milliouneberäich investéieren. De Wirtschaftsministère ënnerstëtzt de Projet mat ëm déi 10 Prozent vun de Käschten.

Am August d'lescht Joer hat den OGBL en plan de maintien dans l'emploi (PME) iwwer zwee Joer mat Guardian ausgehandelt. Domat gouf een desastréise Sozialplang verhënnert. Et stoungen 201 Aarbechtsplazen um Spill, erënnert de Franz Fayot :

Dobäi sinn 60 Departs de Pré-retraite an d'Fréipensioun. 120 départs volonaires an déi 20 Restantë sinn CDDen oder déi fortgaange si mat engem accord à l'amiable mat der Entreprise.
Guardian ass zouversiichtlech, dass se hir 400 aktuell Mataarbechter kënne behalen.

RTL

© René Pfeiffer

De Communiqué vum Ministère

RTL