De Lëtzebuerger Staat investéiert vill Suen an d'Schnelltester, déi jo aktuell a Schoulen a geschwënn a Betriber an am Horeca-Secteur an den Asaz kommen.

Bis ewell huet de Staat ronn 17 Millioune Schnelltester bei 2 chineesesche Produzente bestallt.

Jee no Zort vum Test kascht dësen 1,8 Euro. Alles an allem léisst sech de Staat - bis lo - d'Kafen an d'Verdeele vun de Schnelltester also knapp 26 Milliounen Euro kaschten.

Dat äntwert d'Gesondheetsministesch Paulette Lenert op eng entspriechend parlamentaresch Fro vun de Piraten-Deputéierte Clement a Goergen.
An den éischten Apdikten am Land kann ee vun e Mëttwoch un e Corona-Schnelltest maachen. Vun e Méindeg un ass dat an 2/3 vun den Apdikte méiglech, déi et am Land gëtt. De Virdeel am Verglach zum Selbsttest? Et kritt een en offiziellt Dokument mam Resultat a fir 24 Stonnen e puer Fräiheeten zeréck. D'Nadine Kremer war sech d'Preparatiounen an eng Apdikt ukucken.

Schnelltester an den Apdikten - Rep. Nadine Kremer

All Apdikt ka fir sech entscheeden, wéi si sech organiséiert. A verschiddener kann een einfach esou goen, anerer schaffen op Rendezvous. Am Beschte rifft een an der Apdikt un a freet no. Wéi fannen d'Leit dat ? Géifen si esou een Test maachen ?

"Dat geet relativ schnell an da kann een erëm a Restaurante goen oder esou an et kann een sech vläicht e bësse méi fräi beweegen. Et ass een och méi sécher géif ech soen."

"Mat esou Tester kann ee vläicht méi roueg sech iergendwou hin setze goen, op der Terrass oder an engem Restaurant."

"Selbstverständlech. wisou net. Ech menge wann een do méi sécher an den Dag kann era goen a wann een sech d'Liewensqualitéit verbessere kann. Ech sinn dobäi."

An dräi Fäll dierf ee kee Schnelltest an der Apdikt maachen. Op Ordonnance, wann ee Symptomer huet oder wann d'Apdikt Garde huet.

Den Test gëtt an der Nues gemaach, erkläert d'Apdiktesch Danielle Becker-Bauer. De Virdeel wier ganz kloer : "Mir hunn een offiziellen Zertifikat vum Ministère de la Santé, dee wierklech eng legal Gültegkeet huet. Dat ass jo och den Ënnerscheed zu deene gängegen Tester, déi ee soss iwwerall ka kafen."

Bannent 15 Minutten huet ee säi Resultat. Bei positivem Test gëtt d'Santé kontaktéiert. Et muss een a Quarantaine a sech mat sengem Hausdokter a Verbindung setzen. En negatiivt Resultat gëllt bis zu 24h an erlaabt et, zum Beispill, an de Restaurant ze goen, wann dat neit Covid-Gesetz de 16. Mee a Kraaft trëtt. D'Apdiktesch fënnt dat net laang genuch : "Ech ka mir virstellen, dass wann eng Famill mat dräi Kanner owes wëllen eng Pizza iesse goen, dass se dann net bei eis an d'Apdikt een Test maache kommen. Dofir hate mir eis eigentlech gewënscht, dass se och 48h gülteg wieren am Horesca Secteur. Dat heescht wann d'Leit sech Freides mëttes teste komm wieren, da wieren se gutt gewiescht bis Sonndes mëttes."

D'Apdikte wëssen net wéi grouss den Undrang gëtt, mee am Hibléck op d'Rees- a Vakanzesaison ass de Schnelltest mam Certificat sécher net oninteressant, weess och d'Danielle Becker-Bauer : "Ech ka mer denken, dass de Wellen do ass fir d'Grenzen erëm bëssen opzemaachen, an alles bëssen ze erliichteren, esou dass ech mer virstelle kann, dass vum Juni un den Undrang scho wäert bësse méi grouss ginn."

De Schnelltest kascht 30-35 Euro. Geschenkt ass en also net. Géifen d'Leit en trotzdeem maachen ?

"Ech fannen dat eigentlech ze deier. Bon ech géif et maachen, wann et elo misst sinn, mee ech géing awer net elo einfach esou goen an ee Schnelltest maachen. Dann géif ech mer et schonn e bëssen iwwerleeën."

"Ech fannen dat och deier, mee zum Beispill wann een en elo misst maache fir an de Restaurant oder esou, da géif ech en eemol maachen."

"Mir gi Suen aus fir manner wichteg Saachen, da kann een och do e bëssen eppes bäileeë fir d'Gesondheet."

Eng Lëscht mat den Apdikten déi matmaache fannt dir op pharmacie.lu an op covid19.lu