Déi aktuell Covid-Situatioun erlaabt jo weider Schrëtt am Deconfinement. Dat deementspriechend Gesetz steet de Mëtteg an der Chamber zum Vott.

An der Chamber gouf e Freideg de Mëtteg dat neit Covid-Gesetz mat de Stëmme vun der Majoritéit (31 zu 29) ugeholl, mat deem e weidert Stéck méi Normalitéit nees zeréck kënnt. Virop däerf ee sech nees zu 4 Leit gesinn, doheem, oder och am Bistro oder Restaurant. De Couvre-feu bleift bestoen, spillt awer an Zukunft eréischt vun Hallefnuecht un. Den Horeca-Secteur däerf bis 10 Auer owes op hunn.

Viraussetzung fir eng Plaz bannen am Café oder Restaurant ass en negative Corona-Test. A virun allem d’Tester hunn och an der Chamber fir vill Diskussioune gesuergt. D’Oppositioun huet kritiséiert, datt d’Test-Strategie iwwert de Knéi gebrach gi wier, obschonns een dës schonn zanter Méint gefuerdert hätt. De Gesetzestext gouf kuerzfristeg e Freideg de Mëtteg nach adaptéiert an d’Obligatioun erausgeholl, datt een am Fall vun engem positiven Auto-Test dëse bei der Santé melle misst. Dat ass lo just nach eng Recommandatioun.

Déi nei Covid-Mesurë gëlle vun dësem Sonndeg, de 16. Mee u bis den 12. Juni.

Ëm wat geet et?

Den Text gesäit ënnert anerem vir, datt nees 4 Leit aus verschiddene Stéit kënne beienee kommen. De Couvre-feu soll eréischt vun Hallefnuecht u gëllen. Restauranten a Caféen däerfe bis 22 Auer op hunn an och nees bannen zerwéieren.

D'Konditioun, fir däerfen eran, ass awer en negative Corona-Test. Ënnert anerem kënnen dofir och Schnelltester op der Platz ugebuede ginn. Zu dësem Punkt gëtt et jo nawell Kritik aus dem Horeca-Secteur. Et géifen nämlech nach ze vill Froe ginn, wéi dës Tester an der Praxis solle realiséiert ginn.

E weidere Changement, dee kënnt: Rassemblementer vu bis zu 150 Persounen si méiglech, ënnert de gängegen Hygiènesmesuren natierlech, wat interessant ass fir Sports- a kulturell Manifestatiounen.
An exzeptionelle Fäll, a mat enger Autorisatioun vun der Santé, kann eng Demande gemaach ginn, dass sech bis zu 1.000 Leit versammelen.

Mam neie Gesetz ginn dann och Modifikatioune bei den Hëllefe vun den net-gedeckte Käschte fir Betriber gemaach.

Rapporter vum projet de loi, deen e Freideg de Moien och nach emol Sujet an der parlamentarescher Santéskommissioun ass, ass nees den LSAP-Deputéierten Mars Di Bartolomeo.

Kritik säitens der CSV

Ënnert anerem d'Françoise Hetto-Gaasch hat sech e Freideg de Moien no der Santéskommissioun an der Chamber iwwert e Feele vun engem konkreete Plang fir déi betraffe Secteure beschwéiert.