D’Chèques repas gi falsch benotzt an doduerch ginn de Restaurateuren Zommen a Milliounenhéicht pro Joer verluer.

Am Gesetz ass genee definéiert, wéi Chèques repas dierfe benotzt ginn, ma dat gëtt an der Realitéit awer net agehalen. Dat huet d'Asbl "Don't forget us" e Freideg de Moien op hirer Pressekonferenz kritiséiert. Doduerch géing de Restaurateuren all Joer eng Zomm a Milliounenhéicht verluer goen. Donieft huet "Don't forget us" sech och enttäuscht vis-à-vis vun der Federatioun Horesca gewisen. Uviséiert gëtt do déi lescht Assemblée générale.

Doleance vun Don't forget us asbl / vum Monica Camposeo

D'Horesca géing sech dacks fir de Secteur ausschwätzen, ouni awer mam Secteur ze schwätzen, esou de President vun Don't forget us, de Jean-Claude Colbach. Et hätt ee sech gewënscht, dass d'Generalversammlung vun der Horesca-Federatioun ausgeschriwwe gi wier, fir dass dann och méi Leit hätte kënnen drun deelhuelen.

Effektiv war d'Assemblée générale vun der Horesca den 19. Abrëll digital a vu méi ewéi 1.000 Member, hu just eng 20 deelgeholl.

"Mir wiere sécherlech zu puer dohinner gaangen an ech hunn hinnen dat och scho proposéiert, dass d’Horesca e bësse jonkt Blutt kéint gebrauchen. Eng nei Dynamik do erabréngen. An de Secteur och komplett representéieren."

D'Federatioun géing ze vill aus Hoteliere bestoen, esou nach de Jean-Claude Colbach.

Leit, déi an Diskoen, Caféen oder och zum Beispill an de Buvette vun Indoor-Spillplazen schaffen, géingen sech net representéiert fillen:

"Mir waarden op eng Reaktioun vun der Horesca. Mir si guer net do, fir Problemer ze maachen, mee mir wëlle Léisunge sichen."

Léisunge wëll d'Asbl Don't forget us och fir d'Benotze vun de Chèques repas fannen. Dës Bongen, déi Salariéë fir d'Iesse wärend der Aarbecht kréien, si jo näischt Neies. Ma se ginn awer permanent falsch benotzt. Den Affekot Frank Rollinger vun Don't forget us erkläert:

"D’Chèques repas mussen am Prinzip fir en Haaptplat an engem Restaurant oder Änlechem benotzt ginn. Dat ass eng Faveur, déi de Staat gemaach huet an dofir ass de Chèque repas bis 8,40€ och steierfräi. A wann een en ausserhalb vun deem Kontext asetzt wéi dat, woufir e virgesinn ass, da gëtt dat en Zousaz-Salaire an da kann en och net méi steierfräi sinn."

D’Asbl Don’t forget us fuerdert dowéinst, dass e Rappell gemaach gëtt, wou een d'Bonge wierklech benotzen dierf. D'Circulaire vum 3. Dezember 1993 gesäit effektiv vir, dass en "Repas principal" an engem Restaurant domadder bezuelt ka ginn. An e Supermarché akafen oder souguer tanke goen, ass deemno net reegelkonform, esou den Affekot.

De Schued, deen d'Restaurateuren duerch dës Infraktiounen all Joer hunn, wier immens héich.

"Bei der Valeur vun de Chèques repas leie mer virsiichteg geschat bei 120 bis 140 Millioune Valeur Chèques repas am Joer. 2017 hunn déi eenzel Akteure gesot, dass 60% bis d’Hallschent a Supermarchéë géingen agesat ginn. Wann een da ganz konservativ eng Rechnung mécht, ass ee bei op d’mannst 50 Milliounen Euro all Joer, déi mam Chèque repas falsch ausgesat ginn, also net am Horesca-Secteur."

Suen, déi de Secteur virun allem elo an der Pandemie, gutt kéint gebrauchen.