Dëst huet den Inneministère awer de Weekend decidéiert, dat awer nëmmen, wann d'Gemeng domadder averstanen ass. D'FGFC ass alles anescht wéi zefridden.

Wéi et am Communiqué vun der FGFC heescht, wier dës Circulaire vum Inneministère, déi de Weekend erausgaangen ass, net virdru mat de Sozialpartner ofgeschwat ginn. Ma de sektorielle Vertrieder vum Gemengepersonal ass hei awer ganz däitlech a kloer, a positionéiert sech géint en Transfert vu Santéskompetenzen an de Secteur vun der Gemeng, also géint en Testzenter an der Gemeng.

Ënnert anerem fuerdert d'FGFC, dass d'Inneministesch Taina Bofferding, sou heescht et am Communiqué, "sech hannert d’Gemengepersonal stellt, an net alles schléckt, wat eis als Gemengepersonal soll vu Regierungssäit opgebrummt ginn". Weider heescht et zimmlech kloer säitens der Gewerkschaft: "Fir eis steet fest, datt eng Gemeng keen Testzentrum ass, an och keen dierf ginn. Doriwwer eraus kontestéiere mir formell, datt eise Leit iwwerhaapt non-chalant, sanitär Kompetenzen - déi nëmme verschidde Beruffsstänn hunn - einfach esou vun der Santésdirektioun, par simple Procédure, ausgewise kënne ginn."  Et géinge Grenze ginn, hei géingen ëmmerhi Santéskompetenzen an de Gemengesecteur transferéiert ginn.

Et géif och dobäikommen, dass hei ënnert anerem och d'Responsabilitéiten net wierklech gekläert wieren. Weider gëtt betount, dass d'Gemengepersonal net do wier, "fir déi vun der Regierung chaotesch organiséiert Reouverture vun de Restauranten an de Bistroen ëmzesetzen." Fir d'FGFC geet et hei just drëm fir zertifiéiert Tester ze kréien.

Virun e puer Deeg, esou ënnersträicht d'FGFC, wier déi generell an offiziell Richtlinn op de Gemengen nach ëmmer gewiescht, de Kontakt mam Bierger op e Minimum ze reduzéieren, sou dass d'Gewerkschaft sech dann no dëser Ausso vun der Ministesch dann dach froe stelle géif. D'Gewerkschaft schléit dohier fir, déi scho bestoen Testzenteren, déi och fir esou Operatioune geduecht wieren, nees voll auszelaaschten, iert een d'Gemengen hei géif eranzéien.

Et bedauert een, dass am Kader vun dëser Circulaire vum Inneministère, déi méi Froe wéi Äntwerte géif opwerfen, net mat der FGFC geschwat hätt. Vill Gemengegebaier wieren och iwwerhaapt net equipéiert fir sou vill Leit, sou nach d'FGFC, déi vun engem "No Go" schwätzt.

Hei de komplette Communiqué vun der FGFC als PDF!

No der Kritik vun der FGFC, datt d'Gemengen net och nach Kompetenzen am Santésberäich sollte missten iwwerhuelen huet den Inneministère reagéiert.

An engem Communiqué preziséiert den Inneministère nach eng Kéier, datt och d'Gemengen Deel vun der Solutioun sinn. Et wier kee gezwonge mat ze maachen, esou d'Inneministesch.

Dobäi hätte sech iwwert de Weekend a Méindeg scho 34 Gemenge gemellt hat fir knapp 78.000 Tester, déi vum Staat zur Verfügung gestallt ginn, e Méindeg selwer nach an de Verdeelerzenter op Miersch sichen ze fueren. 15 weider Gemengen hätte sech och schonn ugemellt.

D'Inneministesch Taina Bofferding preziséiert, datt d'Aktioun virun allem géif Solidaritéit mam Horesca-Secteur weisen.