Dat seet den zoustännegen OGBL-Zentralsekretär Pitt Bach am RTL-Interview.

Reaktiounen Impfflicht Domaine Thermal / Rep. F. Kinsch

Rieds gaange wier just vun enger Sensibilisatioun. Hie widdersprécht domat den Aussoe vum President vum Verwaltungsrot eis géigeniwwer, d'Personaldelegatioun géing d'Demarche ënnerstëtzen.

D'Nott, déi d'lescht Woch un d'Mataarbechter erausgoung, wier net mat der Delegatioun thematiséiert ginn. Hei heescht et, d‘Gesondheetspersonal misst vum 7. Juni un noweisen, datt et geimpft wier, am anere Fall misst ee sech reegelméisseg testen oder d’Mataarbechter géifen eng aner Aarbecht kréien, bei där se kee Kontakt mat Patienten hätten. Den OGBL ass dogéint, datt d’Leit op dës Aart a Weis ënner Drock gesat ginn, sou de Pitt Bach. D'Leit misste sensibiliséiert ginn.

"Mir hu keng Dausend Waffen am Kader vun där Pandemie hei an d'Impfung ass déi stäerksten, déi mer hunn an do muss een der Wëssenschaft vertrauen. Mee mir sinn der Meenung, datt et fräiwëlleg muss bleiwen, an dass et kontraproduktiv ass, fir do repressiv oder mat Sanktiounen ze menacéieren, wéi dat zu Mondorf de Fall ass, well dat déi breet Akzeptanz vun der Impfung konterkaréiert an total do dogéint geet."

Doriwwer eraus dierft de Patron och guer net froen, dass ee beweist ob ee geimpft ass oder net.

" Mir sinn och net der Meenung, datt dat soll goen, dass den Employeur esou perséinlech Informatioune ka fuerdere vum Personal, dass d'Personal do kann obligéiert ginn matzedeelen, ob se sech impfe loossen oder net, oder souguer wann net, ob se do gesondheetlech iergendwellech Grënn dofir hunn, a wéi eng Grënn et dofir ginn, datt se dat net maachen. Dat geet den Employeur näischt un an dat ass och net korrekt fir dat ze fuerderen, dass d'Leit déi Informatioune matginn."

D'Personaldelegatioun géing elo d'Gespréich mam Verwaltungsrot sichen.

D'Approche zu Munneref gouf och um Bord vun der Chamber-Gesondheetskommissioun thematiséiert, sot eis de President vun der Kommissioun Mars di Bartolomeo, hei goung et ëm eng Schnelltest-flicht an Alters- a Fleegeheemer.

"Déi Initiative, déi do geholl ginn ass, ass sécher och eng vun den Ursaachen, dass mer hei séier Kloerheet beim rechtleche Kader mussen zéien, mat allen Elementer, déi dovun tanguéiert sinn."

D'Gesondheetsministesch Paulette Lenert war net fir eng Reaktioun disponibel. An enger schrëftlecher Stellungnam vum Gesondheetsministère heescht et, et géing zu Munneref net ëm eng Impfflicht goen, mä ëm "en Encouragement, sech impfen ze loossen."

Komplett Äntwert vum Ministère:

„Virop sief bemierkt, dass et sech net em eng „Praxis“ handelt, mee ëm eng Démarche déi ab dem 7. Juni ugeduecht ass an déi och an hiren Context gesat soll ginn:

Et handelt sech och net ëm eng Impfpflicht, mee ëm en Encouragement, sech impfen ze loossen. Desen Opruff vum Domaine Thermal riicht sech un eng Minoritéit vun Personal déi am Département „Santé“ schaffen, an déi nach net geimpft gi sinn.

Dës Salarieens sin an enkem Contact mat Patienten, déi hinnen fir eng Cure iwerwisen gi sinn.

Dem Domaine Thermal ass dru geléen, dass dës Patienten an den beschtméiglechen sanitairen Conditiounen hiren Traitement kenne machen. Als Domaine Thermal an établissement public huet Mondorf eng Reputatioun ze vertrieden, déi iwert d’Grenzen vum Land eraus ginn.

Als « établissement de cures thermales » laut Spidolsgesetz, fügt sech des Démarche an d’Positioun vun der nationaler Ethikkommissioun vum 1. März 2021 an:

« Un hôpital ou un centre pour personnes âgées est, de surcroît, en relation contractuelle de nature privée avec les patients et les pensionnaires, et doit assurer leur protection et leur sécurité, alors que tant les patients que les pensionnaires sont, par hypothèse, vulnérables, voire hautement vulnérables. »

Mat dëser Note un d’Personal mecht den Domaine och en Opruff un „responsabilité civique“ an un d‘Solidaritéit mat der Bevölkerung.

Den Contenu vun der Note huet iwwregens och den Accord vum Vertrieder vum Personal kritt.“