D'Patronat an d'Gewerkschafte si sech no méi ewéi 6 Méint Verhandlungen an deels Sträit eens ginn an hunn de Kontrakt elo ënnerschriwwen.

Kollektivverträg bei Banken a Versécherungen - Reportage vum Diana Hoffmann

Sechs Méint laang hunn d'Verhandlunge fir déi nei Kollektivverträg fir de Secteur vun de Banken an d'Versécherunge gedauert. En Donneschdeg goufe se finalement ënnerschriwwen. Den OGBL an den LCGB schwätze vun der éischter Augmentatioun vun der Paien zanter 9 Joer, an erhiewen och staark Virwërf géint d'Bankegewerkschaft Aleba, an hier onméiglech Aart a Weis ze verhandelen.

D'Gewerkschaften OGBL an LCGB hunn sech e Freideg de Moien op der Pressekonferenz zefridde gewisen iwwer déi nei Kollektivverträg, déi si mat dem Daachverband vun de Versécherungsgesellschaften der ACCA an deem vun der Associatioun vun de Banken der ABBL hunn. Fir d'éischt Kéier zanter ganz laangem ass elo eng Augmentatioun vun de Paie festgehale ginn, wéi de Paul Araujo, Secretaire vum LCGB erkläert. Ob dësem Punkt wier et am schwéierste gewiescht, en Accord ze fannen.

Wichteg wier deenen zwou Gewerkschaften OGBL an LCGB doriwwer eraus de Bien-être vun den Employéeën. Och hei hätte kënne Verbesserungen ausgeschafft ginn, déi zesumme mat den Delegatiounen ëmgesat solle ginn. Heizou zielt zum Beispill e Congé social vun ob d'mannst 5 Deeg an eng besser Aarbechtsorganisatioun mam Droit à la Déconnection an der Reegelung vum Teletravail.

Den Ierger, deen déi zwou Gewerkschafte wärend de ganze Verhandlungen awer mat der Bankegewerkschaft Aleba hat, sëtzt och no Ofschloss vun de Kollektivverträg nach ëmmer déif. D'Véronique Eischen vum OGBL betount, datt ee versicht hätt op d'Gewerkschaft zouzegoen, an dat esouguer och nach nom Eclat, wou d'Bankegewerkschaft eleng en Accord de principe mat der Patronatssäit ënnerschriwwen hat. Den OGBL an den LCGB haten awer fonnt, dat dësen a kenger Hisiicht zu enger Verbesserung vun de Verhältnesser fir d’Employeuren aus dem Secteur gefouert hätt.

Um Enn hunn awer déi dräi Gewerkschaften zesummen déi zwee nei Kollektivverträg ënnerschriwwen. Bis 2023 wäerten d’Punkten op dësen ëmgesat ginn.