Vun elo bis de September ginn et op 10 verschiddene Plazen hei am Land Sonnecrème-Spender.

Hautkriibs ass a bleift e Problem. Och zu Lëtzebuerg. All Joer gëtt iwwert d'Summerméint op de Problem opmierksam gemaach. Dëst Joer huet d'Kriibsfondatioun sech eng besonnesch afale gelooss.

Méi restriktiv Konditiounen dobannen, heescht Corona motivéiert vill Leit virun d'Dier. Sief dat op den Trëppelwee oder op d'Terrass. Dermatologe warnen awer virun der Accumulatioun u sonnebedéngte Schied un der Haut, déi op kuerzzäiteg UV-Strale vun der Sonn zeréckzeféieren si. D'Konsequenz: D'Haut gëtt méi séier al an de geféierleche wäissen a schwaarzen Hautkriibs dauchen op.

D'Hautkrankheeten huelen zou, dat och zu Lëtzebuerg, esou d'Doktesch Carole Bauer, Presidentin vun der Lëtzebuerger Kriibsfondatioun: „Zuele beleeën, datt an de leschte 50 Joer a ganz Europa Diagnose vun Hautkriibs all 10 Joer doubléieren."

Zu Lëtzebuerg gi Schätzungen no all Joer eng 150 nei Melanomer konstatéiert. Den Hautkriibs géif dacks ënnerschat ginn, esou d'Doktesch: „Et schwätzt ee vill vu Melanomer, well et dee schlëmmsten Hautkriibs ass. Den Hautkriibs, wa mer déi verschidden Zorten all zesummen huelen, ass awer den heefegste Kriibs zu Lëtzebuerg. D'Hautkriibse sinn awer net onbedéngt all ganz uerg."

Déi grouss Zuel un Hauterkrankung ass virun allem mam Fräizäitverhale vun de Leit z'erklären. Duerch Temperaturen, déi weider klammen, verbréngen d'Leit méi Zäit dobaussen an et gi méi sonneg Deeg wéi et se nach virun e puer Joerzéngte gouf.

An deem Kader kläert d'Kriibsfondatioun dëse Summer op. An engem Pilotprojet gi bis September op 10 verschiddene Plazen am Land Sonnecrème-Spender installéiert. Agecrèmt gëtt sech mat 50+. Nieft dem Stauséi, der Musel, steet esou een zum Beispill och zu Hesper am Park.

Eng Initiativ, déi an den nächste Jore kéint weider ausgebaut ginn, esou nach d'Fondatioun. Och an anere Gemengen.