Mam Vott vum neie Covidgesetz goufen eng Partie Mesurë méi labber gemaach. E Covidgesetz, dat definitiv Loscht op Summer mécht.

Zanter e Sonndeg Hallefnuecht kënnt nees e gutt Stéck méi Normalitéit a Fräiheet an eisen Alldag. Et dierf een nees bis zu 10 Leit doheem ëmfänken. Bannenan am Restaurant, Bistro oder Café dierfe vum 13. Juni un, ouni Tester, nees 4 Leit beieneen um Dësch sëtzen, dobausse esouguer 10. Et sief dann, de Restaurant oder Café decidéiert nom sougenannte CovidCheck-System ze fueren. Deen Ament gëlle keng Coronamesurë wéi Distanz a Mask méi, d'Etablissementer mussen awer kontrolléieren, datt all Client a Member vum Personal geimpft, getest oder geheelt ass. Dofir kritt een elo speziell Zertifikater, déi een als Pobeier- oder digital Versioun ka mat sech droen. Alternativ kann een och nach ëmmer de Schnelltest op der Plaz maachen. Wann e Betrib mam CovidCheck-System fonctionéiert, muss een dat bausse kloer affichéieren.

RTL

© Screenshot Santé / Apple App Store

Mam CovidCheck si vun e Sonndeg un och nees Evenementer wéi Concerten, Matcher oder och Hochzäiten ouni Gestes-barrières mat bis zu 300 Leit méiglech. Et brauch ee keng Autorisatioun, d'Evenementer mussen awer bei der Santé ugemellt ginn, an zwar vun engem Professionellen. Ouni CovidCheck gëllt Mask an 2 Meter Distanz vun 10 bis 50 Leit a vu 50 bis 300 Leit muss een och fest Sëtzplazen hunn.

RTL

© Screenshot Santé

An der Schoul mussen d'Kanner am Haff keng Mask méi unhunn, bannen awer nach, och wa se sëtzen. D'Reegel vu maximal engem Client op 10 Quadratmeter am Commerce gëllt net méi. An et dierf een och nees an der Ëffentlechkeet Alkohol consomméieren.

Leit, déi komplett geimpft oder geheelt sinn, musse vun e Sonndeg un net méi a Quarantän, wa se Kontakt mat enger infizéierter Persoun haten. Et gëtt elo eng Testflicht fir Fleeg- a Gesondheetspersonal an eng Testflicht fir Visiteuren. D'Schnelltester, déi vu Professionelle gemaach ginn, sinn net méi 24, mä elo 48 Stonne laang gutt.

Dat neit Gesetz, dat e Samschdeg vun enger breeder Majoritéit vun de Regierungsparteien, CSV a Piraten an der Chamber gestëmmt gouf, gëllt viraussiichtlech bis de 15. Juli.