Et geet drëms, kloerzestellen, ob sech beim Large-Scale-Testing un d’Prozeduren a Gesetzer gehale gouf an ob d’Sue vum Staat anstänneg verwalt goufen.

Am Mee zejoert gouf zu Lëtzebuerg domat ugefaangen, systematesch d’Leit op eng Coronavirus-Infektioun ze testen. Entretemps ass de Large-Scale-Testing a senger 3. Phas an de Käschtepunkt ass zënter dem Lancement vum Projet op iwwer 150 Milliounen Euro geklommen. De Rechnungshaff ass elo beoptraagt, iwwert de Finanzement an d’Prozedur opzeklären.

D’Deputéiert vun der Budgetskontrollkommissioun hunn dofir e Froekatalog ausgeschafft. Et geet drëms, kloerzestellen, ob sech un d’Prozeduren a Gesetzer gehale gouf an ob d’Sue vum Staat anstänneg verwalt goufen. Wat d’Cour des Comptes elo analyséiere soll, erkläert d’Presidentin vun der zoustänneger Kommissioun, d’CSV-Deputéiert Diane Adehm:

Mä alles wat de finanzielle Volet ass vum Large Scale Testing dat kann d’Cour des Comptes kucke goen. Zum Beispill, si Marchée gemaach ginn, ass dat Gganzt ausgeschriwwe ginn. Wei sinn déi Decisioune geholl ginn. Dunn ass decidéiert ginn, datt dat um Niveau vum Etat wier. Et war jo ursprénglech e Rechercheprojet. Ween huet déi Decisioun geholl, wéi ass déi Decisioun geholl ginn.

An der Kommissioun wier ee sech eens gewiescht, datt de Rechnungshaff net kéint all Aspekter kontrolléieren, déi den ADR a senger Resolutioun gefuerdert huet. Fir den ADR-Deputéierte Fernand Kartheiser zielen nämlech och nach politesch sanitären Aspekter, déi awer wuel éischter an der Santéskommissioun ze analyséiere wieren.

An do geet et dorëm, fir ze kucken, wat da lo wierklech de Käschtennotze war vum Large Scale Testing. Do sinn eng Rei Aspekter, iwwer déi ee muss schwätzen. Fir d’éischt ass deen immens héije Präis, fir iwwerhaapt emol nëmmen ee positiivt Resultat ze fannen. Dir wësst, datt ee Virolog gesot hat, 29.500 Euro fir ee positiivt Resultat. Da musse mer lo kucken, huet dat dann och wierklech Infektiounsketten ënnerbrach. Well do gouf et ganz kontrovers Diskussiounen, och ënner Medezinner. Fir ze kucken, wéi ustiechend ass iwwerhaapt eng net symptomatesch Persoun.

An dësem Beräich wieren nach vill Froen op. Den André Bauler vun der DP seet, och him géing et dorëms, fir Transparenz a Kloerheet an dee ganze Prozess ze kréien.

Mir hunn eis als Chamber domat beschäftegt fir dem Rechnungshaff eng Rei Froe mat op de Wee ze ginn, fir ze kucken, wéi ass dee ganze Prozess vum LST verlaf. Da virun allem och, wat huet dee Projet kascht, wou si Kreditter hierkomm.

Wéi ass dee ganze Prozess vum LST ofgelaf? Ugangs war et jo e Fuerschungsprojet, dono huet d’Santé iwwerholl. Wat hunn déi 3 Phase reell kascht a wou koumen d’Kreditter hier? Wat waren d'Selektiounskrittären, fir d’Prestataires de service erauszesichen, wien huet dës opgestallt, gouf sech un d’Ausschreiwungsgesetz gehalen a goufen et eventuell Interessiskonflikter? Gouf zu all Moment eng Trennung garantéiert tëscht deenen, déi en Optrag ginn hunn an deenen, déi en Optrag kruten?

De Rechnungshaff soll op Basis vun all deene Froen elo e Rapport ausschaffen.

Froekatalog Large Scale Testing / Reportage Diana Hoffmann