2020 hu méi jonk Leit, dofir awer manner eeler Leit vun enger Consultatioun bei engem spezialiséierte Psychiater profitéiert.

D'Pandemie hat e kloren Impakt op d'psychosozial Krankheeten, déi zejoert opgetaucht an traitéiert goufen. Absënns an de Méint, wou d'Pandemie zu Lëtzebuerg ukomm ass, sinn och méi Antidepresseure geholl ginn.

Dat geet aus der Äntwert vum Sozialminister Romain Schneider op eng parlamentaresch Fro vun den LSAP-Deputéierten Di Bartolomeo an Engel ervir. Deemno ass d'Zuel vu Patienten ënner 50 Joer ëm ronn 12 Prozent geklommen, d'Zuel vu Patienten iwwer 50 Joer ass awer ëm ronn 8 Prozent gefall. Dat léich ënnert anerem dorun, datt wärend der Coronakris d'Téléconsultatiounen agefouert goufen, vun deene méi jonk Leit méi profitéiert hätten.

2020 hu ronn 6.700 Patiente vun enger Consultatioun bei engem Psychiater profitéiert - alles an allem ass et eng Hausse vun 2,1 Prozent. Wärend d'Zuel vu Patienten iwwert d'Joer gekuckt 2019 relativ stabel war, goufen et 2020 staark Variatiounen. D'Zuel vu Leit, déi an d'Consultatioun komm sinn, ass am 2. Trimester 2020 geklommen, am 3. a 4. Trimester awer nees staark gefall.

En änlecht Phenomen gesäit ee bei de Medikamenter - 2020 kruten änlech vill Patienten Antidepresseuren, Antipsychiotika, Angschtléiser oder Sedative wéi 2019, allerdéngs gesäit ee bei all dëse Medikamenter e Peak am Mäerz zejoert. Global gesi goufen zejoert ronn 156.000 Patienten rembourséiert, well se e psychotroopt Medikament wéi zu Beispill Berouegungsmëttel verschriwwe kruten.

Datt d'Absencen op der Schaff duerch mental Problemer zejoert eropgaange wieren, kann de Minister Schneider iwwerdeem net kloer beleeën, well vill am Homeoffice geschafft gouf, respektiv och vill Salariéë fir eng gewëssen Zäit an enger Mesure vun Isolement oder Quarantaine waren.