No de Remarken am Avis vum Staatsrot huet d'Santés-Chamberkommissioun decidéiert, fir d'Schnelltester awer bis 1 Auer gülteg ze loossen.

Dat huet eis de President vun der Santés-Chamberkommissioun Mars Di Bartolomeo en Dënschdeg confirméiert.

En Donneschdeg gëtt an der Chamber déi nei Versioun vun de Covid-Restriktioune gestëmmt, déi da vun e Freideg un iwwert de ganze Summer daueren. Nieft dem Collège médical louch och den Avis vun der Chambre de Commerce zum Text vir.

D'Handelskummer hat jo bedauert, datt d'Schnelltester net méi no Hallefnuecht valabel sinn an hat gefrot - genee wéi den Horeca-Secteur - datt dës Limitt op 1 Auer nuets reportéiert gëtt.

D'Ministere Lenert a Kersch hate jo leschten Donneschdeg annoncéiert, dass just nach zertifiéiert Schnelltester valabel sinn no Hallefnuecht. An deem Kader goufen och d'Strofen am Horeca-Beräich eropgesat vu 4.000 op 6.000 Euro, bei Recidive 12.000 Euro, wa sech net un d'Coronamesurë gehale gëtt.
Eng kloer Oppositioun gëtt et vun der Chambre de Commerce, wat e systematescht méi strengt Verschäerfe vun de Sanktiounen géint Firmen ugeet, déi géint d'Anti-Covid-Konditioune verstoussen. Gefuerdert gëtt villméi de Status Quo, amplaz lo wëllen e Maximum vu 6.000 Euro als administrativ Strof anzeféieren. Dës Zomm wier net proportionéiert an iwwerdriwwen.

Eng aner Fro, déi sech d'Chambre de Commerce stellt, ass, wéi praktesch sollen d'CovidCheck-Reegele bei Stéit doheem kontrolléiert ginn, wa méi Leit op Besuch kommen.

A sengem Avis zum neie Covid-Gesetz huet de Staatsrot verschidde Prezisioune vermësst, vrun allem wat d'Bedeitung vum Wuert "Rassemblementer" ass; en Iwwerbegrëff, deen och fir Leit zielt, déi privat doheem op Besuch kommen, mee och fir Leit, déi sech spontan op der Strooss zu méi begéinen. De Staatsrot schwätzt keng Oppositioun aus, mee vermësst Kloerheet.

De Vott vum neie Gesetz ass fir en Donneschdeg geplangt an déi nei Reegele gëllen da vun e Freideg un, de ganze Summer laang.