Zënter Abrëll gëtt et zu Lëtzebuerg gréisser Problemer mam Respiratoresche Syncytial-Virus, kuerz RSV. Betraff si virun allem Puppelcher a kleng Kanner.

Nieft Corona mécht elo nach en anere Virus vun den Otemweeër Suergen, wat awer fir d'Joreszäit aussergewéinlech ass.
Et handelt sech ëm de Respiratoresche Syncytial-Virus, kuerz RSV. Betraff si virun allem Puppelcher a kleng Kanner. Dowéinst koum et zu Problemer an der Kannerklinik.

RS-Virus/Reportage Pit Everling

Wéinst dësem Virus sinn d'Urgencen an der Kannerklinik an der Lescht iwwerfëllt gewiescht. D'Zuele sinn op bis zu 240 Patiente pro Dag eropgaangen. Am Abrëll gouf et eng Hausse vun 120% par Rapport zum Joer virdrun. Et huet och missten op Better an der Dagesklinik zeréckgegraff ginn. Programméiert Operatioune goufen aus dem Hôpital du jour op aner Plazen transferéiert.

Dat äntwert d'Gesondheetsministesch Paulette Lenert den CSV-Deputéierte Georges Mischo a Marc Spautz op eng parlamentaresch Fro.

Vun enger exzeptioneller Situatioun mat Wanter-Viren am Summer hat rezent och d'Kannerdoktesch Isabel de la Fuente op enger Table ronde vum CHL geschwat.

"Mir hunn am Juli eng Epidemie vu Bronchiolitten an anere respiratoreschen Infektiounen. D'pediatresch Klinik leeft iwwer. Isolementer wéinst Covid gi schwiereg, well d'Better voll si mat kranke Kanner."

Och am Ausland ass den RS-Virus en Thema. De Robert-Koch-Institut mécht en Ausbléck op den nächsten Hierscht a Wanter an do kéint och den den RS-Virus eng Roll spillen.

Wéinst de Corona-Mesuren hätten an der leschter Wantersaison d'Influenza oder den RSV net sou vill kënnen zirkuléieren, dofir géing d'Grondimmunitéit elo feelen.

RSV kéim zyklesch vir. A Mëtteleuropa wier d'Inzidenz normalerweis vun November bis Abrëll am héchsten.

RSV-Infektionen kënnen iwwregens an allen Altersgruppe virkommen, heescht et weider vum RKI. Quasi all Kand mécht bannent den éischten zwee Liewensjoren op d'mannst eng Infektioun mam RS-Virus duerch.

Wat d'Situatioun an der Lëtzebuerger Kannerklinik ugeet, sou kritt déi am September zwee Urgentistë bäi. Och iwwer aner zousätzlech Mesurë gëtt nogeduecht, zum Beispill kéinte weider 8 Better mobiliséiert ginn an d'Ouvertureszäite vun der Maison médicale pédiatrique kéinten adaptéiert ginn, heescht et weider aus dem Gesondheetsministère.