Eng ganz Partie Leit géife sech och scho fir dës Offer interesséieren an och iwwer 150 Generalisten hunn Interessi gewisen.

Impfen an Doktesch-Praxissen - Reportage vum Diana Hoffmann

Vun e Freideg u ginn déi éischt Leit bei hirem Generalist géint de Covid geimpft. Dëst an enger vun de 4 Gemeinschaftspraxissen, déi un engem Pilotprojet deelhuelen. D'Vaccine sollen en Donneschdeg an de Cabinete geliwwert ginn. D'Nofro vun de Patiente stellt zefridden, seet den Dr. Guillaume Steichen, Generalsekretär vun der Associatioun vun den Dokteren an Zänndokteren, der AMMD.

Bis elo hu sech iwwer 80 Leit eleng an der Gemeinschaftspraxis zu Esch gemellt, an där och de Guillaume Steichen praktizéiert. Och a jeeweils engem Gemeinschaftscabinet zu Miersch, Réiden a Stroossen kënne Leit sech bis elo impfe loossen. Geimpft gi wäert awer eréischt vun e Freiden u ginn. D'Vaccine fir an de Praxissen hunn nach musse bestallt a geliwwert ginn.

An der 2. Phas, déi nächste Méindeg ugeet, wäerten dann nach méi Generalisten an och Pediater matmaachen. Eng 150 Dokteren hätten Interessi gewisen, 80 géingen der elo mol vun der nächster Woch un dobäi kommen.

Den Guillaume Steichen hofft, dat duerch d'Vertrauen, wat d'Patienten dacks an hire Generalist hunn, nach méi Leit kënnen iwwerzeegt ginn, sech impfen ze loossen.

An Ofsprooch mat hirem Dokter kënnen d'Leit dann och selwer wielen, mat wat fir engem Vaccin si wëlle geimpft ginn. Just Moderna ass net disponibel, wëll dësen net virschrëftsméisseg an de Praxisse stockéiert ka ginn.

Wie sech wëll an enger Praxis impfe loossen, soll sech bei sengem Hausdokter renseignéieren. A wéi engen Praxisse bis elo géint de Covid geimpft gëtt, fannt Dir op www.covid19.lu.