Dat huet de Premier Xavier Bettel an der Chamber nach emol betount, an där um Dënschdeg den Owend déi nei Versioun vum Covid-Gesetz gestëmmt gouf.

D’Impfunge waren en Diskussiounspunkt tëscht de verschidde Parteien.

De Premier huet ënnerstrach, datt zu Lëtzebuerg keng Impfflicht wäert kommen, mee ee sech awer virstelle kéint, dat wann d’Chiffere klammen, een zum Beispill de CovidCheck kéint generaliséieren. Hie géif sech awer net wënschen, datt ee souwäit misst goen, mee dofir misst ee bei 80 bis 85% bei den Impfunge kommen.

Der Gesondheetsministesch Paulette Lenert no kéint een den Impftaux just mat Iwwerzeegung eropgesat kréien, mee si wier awer och optimistesch, datt den Taux elo mat der Rentrée erëm klamme wäert.

Neit Covid-Gesetz/Reportage Claudia Kollwelter

"Dat neit Covid-Gesetz gesäit just eng Partie punktuell Adaptatioune vir, déi net onwichteg sinn, mee déi eis Haaptmeure géint de Virus net a Fro stellen!" Dat huet de Rapporteur vum Text, de Mars Di Bartolomeo am Cercle betount, wou déi nei Versioun vum Covid-Gesetz gestëmmt gouf.

D'Impfunge sollen dem LSA-Deputéierte Mars Di Bartolomeo no d'Gesellschaft net trennen, mee eis Fräiheeten erméiglechen:

D'Impfung ass net eise Géigner, eise Géigner ass a bleift de Virus. Elo, wou mer genuch Impfstoff hunn, genuch ugebuet gëtt, mer genuch Personal hunn an e Choix vun Impfstoff, gëtt et kaum nach Evidenz-baséiert Argumenter géint eng Impfung.

E Wee zréck an d'Normalitéit ass och fir de Claude Wiseler vun der CSV just iwwert d'Impfunge méiglech. Lëtzebuerg géif awer do liicht ënnert der europäescher Moyenne leien, an dat obwuel d'Campagne hei am Land fir de Claude Wiseler gutt organiséiert war. Et misst een elo déi Gruppe vu Leit viséieren, wou de Refus am gréisste wier:

Ob där aner Säit ass et och kloer, datt d'Regierung deenen, déi geimpft ginn, souwäit wéi méiglech all Méiglechkeete bidden, fir fräi ze zirkuléieren a sech an der Normalitéit ze beweegen.

Fir d'Nathalie Oberweis vun déi Lénk allerdéngs géif d'Pandemie nei Divisioune schafen an aler bekräftegen:

Mir hätte besser, mer géingen eis emol fir d'Grënn, d'Zweiwel an d'Ängschten interesséieren, déi Mënschen an eiser Gesellschaft hunn. Vun do aus kéint een dann och anescht handelen. Mir kéinte vläicht wierklech an en Dialog triede mat deene Leit an esou och méi Leit erreechen.

D'Josée Lorsché vun déi Gréng fënnt et bedenklech, datt Impfbereetschaft bei den 20-45 Joer alen Leit am niddregsten ass:

E jonken Erwuessenen, dee sech net impfe wëll loossen, entscheet sech kloer fir d'Krankheet an domat och fir de Risiko vu weidere Fräiheetsaschränkungen. An en entscheet sech och kloer fir d'Ustieche vu senge Kanner, déi scho vill hu missen astiechen a solidaresch waren.

De Sven Clement vun de Piraten huet sengersäits gefuerdert, datt déi Leit, déi sech net kënnen impfen loossen, gratis PCR Tester zur Verfügung gestallt kréien, déi jo vun e Mëttwoch un net méi wäerten ugebuede ginn.

D'Gesetz gouf mat 54 Jo-Stëmmen, 4 Nee-Stëmmen an 2 Enthalungen ugeholl.