De Large Scale Testing ass just vun engem Laboratoire duerchgefouert ginn. BioneXt LAB gesäit doran onfair Konkurrenz a reecht eng Klo an.

Bei der Organisatioun vum Large Scale Testing, deen am Fréijoer 2020 lancéiert gouf, hätt de Lëtzebuerger Staat kloer géint d'Gesetz verstouss. Dat behaapt de private Lëtzebuerger Laboratoire BioneXt LAB a geet domat elo viru Geriicht. De Staat hätt missen en transparenten a fairen Appel d'offres maachen an hätt net einfach dierfen eng Entreprise eraussichen, déi dës grouss ugeluechten Test-Aktioun eleng organiséiert, esou d'Argumentatioun.

De Problem wier net de Large Scale Testing u sech, ma d'Aart a Weis, wéi en organiséiert gi wier. Nämlech andeems de Staat Laboratoires Réunis direkt den Optrag dofir ginn huet, ouni dëse virdrun ëffentlech auszeschreiwen.

Den Dr. Jean-Luc Dourson vu BioneXt LAB

Doduerch wier nämlech eng onfair Konkurrenz um Marché entstanen, esou den Direkter vu BioneXt LAB, Dr Jean-Luc Dourson: "Apportant des avantages économiques gigantesques à un seul acteur parmi tous les autres qui ne peuvent pas en bénéficier. BioneXt LAB dénonce aussi le fait que les tests gratuits ont été organisés dans le cadre du Large Scale Testing avec un seul acteur, qui plus est empêchant la population d'avoir son libre choix."

Labo war scho virbereet

Een Indice dofir, dass vun Ufank u Laboratoires réunis den Optrag vum Large Scale Testing sollt kréien, gesäit ee bei BioneXt zum Beispill doran, dass Ecolog (e Sous-Traitant vu Laboratoires réunis) schonn Enn Mäerz 2020 ugefaangen huet, massiv Personal ze rekrutéieren. Dobäi war de Large Scale Testing dee Moment weder ëffentlech annoncéiert, nach fir aner Entreprisen ausgeschriwwe ginn.

An och bei der zweeter Phas vum Large Scale Testing wier net fair gespillt ginn, esou den Dr. Dourson. Obschonn hei formal een Appel d'offres gemaach gi war. "Pseudo-Appel d'offres pour la phase 2, pourquoi?", freet den Dr. Dourson. "Parce qu'en fait, quand on lit l'appel d'offres, il faut en à peine 15 jours organiser 17 stations de tests, faire du recrutement d'infirmières pour ces stations de tests, organiser la technique de pooling utilisé pour le Large Scale Testing et en plus utiliser un réactif précis qui est indiqué dans l'appel d'offres de la société Fast Track Analytics, ancienne société de Laboratoires réunis."

Op dësen Appel d'offres hätt sech deemno effektiv just eng Firma kënne mellen, an zwar déi, déi schonn déi 1. Phas organiséiert hat.

Virworf vun illegaler staatlecher Bäihëllef

Enn August huet BioneXt dowéinst eng Prozedur virum Lëtzebuerger Bezierksgeriicht lancéiert. Ausserdeem fuerdert de Laboratoire Schuedenersatz vum Staat fir dee Schued, deen der Entreprise duerch dem Staat seng Feeler entstane wier. Gläichzäiteg geet BioneXt nach eng Etapp méi wäit. D'Entreprise wëll nämlech nach dëse Mount eng Plainte géint de Lëtzebuerger Staat bei der europäescher Kommissioun maachen.

Andeems een de Large Scale Testing net ausgeschriwwen hat, wier net sécher, dass net och eng aner Firma dee selwechte Service fir manner Geld hätt kënne maachen. An deem Fall wieren déi Suen, déi souzesoen ze vill bezuelt gi wieren, eng illegal staatlech Bäihëllef u Laboratoires réunis gewiescht.