Dat huet den Thomas Dentzer, Virolog a Responsabele bei der Santé fir den LST eis confirméiert. Teste wier awer net op Dauer eng Alternativ zum Impfen.

Zanter dem 15. September ass de Large-Scale-Testing no bal 2 Milliounen Tester an 2 Milliounen Euro Onkäschten d'Woch eriwwer. Den Ament wier d'Santé nach amgaangen, déi lescht Zuelen zesummenzeschreiwen, sou de Virolog Thomas Dentzer en Donneschdeg de Moien am RTL-Interview. An da géif e Kassensturz gemaach ginn, wéi vill d'Campagne vun de Massentester schlussendlech kascht huet. Et geet ee vun ëm déi 110 Milliounen Euro aus.

Sécher wier, sou de Vertrieder vun de Santé, datt een ënnert dem maximale Budget bliwwe wier. Virun allem, well d'Testkapazitéiten net all ausgenotzt goufen. Ze Lescht louch d'Participatioun bei 50 Prozent. An den zwou éischte Phasen an der Moyenne souguer nëmme bei ëm déi 30 Prozent.

Den Thomas Dentzer huet am Interview och annoncéiert, datt d'Santé onofhängeg Experten aus dem Ausland mat enger weiderer Evaluatioun iwwert de Large-Scale-Testing chargéiert huet. Zil ass et, fir onofhängeg ze kucken, wat de Large-Scale-Testing fir déi ëffentlech Gesondheet war a wat säin Impakt an der Pandemie war.

PCR-Tester gi weider op Ordonnance vum Dokter an et fuere mobil Equippe eraus, haaptsächlech an den Alters- a Fleegeheemer.

Thomas Dentzer iwwer LST / Interview Claude Zeimetz (Deel 1)
Thomas Dentzer iwwer LST / Interview Claude Zeimetz (Deel 2)