Déi jonk Afghanin koum grad nach mat Zäite mat engem Evakuationsvol aus hirem Heemechtsland a kann elo Asylrecht zu Lëtzebuerg kréien.

Den Ausseminister Jean Asselborn war dës Woch op Visitt zu Budapest, wou hie sech ënner anerem mam Buergermeeschter vun der ungarescher Haaptstad Gergely Karácsony getraff huet.

Ufank September gouf hien iwwert d'Schicksal vun der jonker Afghanin Tahira opgekläert. Si hat et, anescht wéi vill aner Leit, Enn August nach mat Zäiten op een Evakuationsfluch gepackt, dat de 25. August zesumme mat zwee Cousinen an der Fra vun engem vun de Männer. Si koumen zu Budapest un an déi zwee Männer an déi aner Fra konnte weider an Éisträich reesen, well d'Männer dës Staatsbiergerschaft hunn.

D'Tahira selwer huet misste zu Budapest bleiwen, well Éisträich aktuell keng Flüchtlingen aus Afghanistan ophëlt. Wéi de Lëtzebuerger Ausseminister awer de 4. September iwwert d'Schicksal vun der 20 Joer jonker Afghanin opgekläert gouf, huet de Jean Asselborn decidéiert, déi jonk Fra op Lëtzebuerg ze bréngen, wou si hir Prozedur lancéiere kann, fir Asyl unzefroen. Antëscht war dës schonn an engem Flüchtlingslager un der Grenz zu Serbien ënnerkomm, wou si 3 Méint hätt kéinte bleiwen, esou schreift d'Tageblatt. 12 Deeg méi spéit awer konnt si op Lëtzebuerg fléien.

E puer Woche souz si an Ungarn fest, mä den Donneschdeg den Owend koum si zu Lëtzebuerg un a kann hir Asylprozedur starten, esou de Minister Jean Asselborn an engem Bäitrag op Facebook. Si hat de Lëtzebuerger Ausseminister um Flughafen zu Budapest begéint.

RTL

© Jean Asselborn

"Et gëtt nach mënschlech Liichtblécker am Drama ëm den Afghanistan a mir hëllefen zu Lëtzebuerg, dass se bestoe bleiwen. Déi schéi Säit am Alldag vun engem, dee fir Asyl zoustänneg ass", schreift den Ausseminister Jean Asselborn zu enger Foto vun deenen zwee.

Nom Ofzuch vun den US-Zaldote konnten d'Taliban an Afghanistan iwwerraschend séier Buedem guttmaachen. Mëtt August ass déi afghanesch Haaptstad Kabul gefall. Um Flughafen hu sech dorops hin deels dramatesch Zeenen zougedroen.