D'Vollekszielung gëtt vum 8. November bis de 5. Dezember hei am Land gemaach.

Zil vum Recensement wier et, Donnéeën iwwer Leit, Stéit a Logementer ze sammelen. Informatiounen, déi wichteg wieren, fir statistesch Analysen ze maachen, huet de Wirtschaftsminister Franz Fayot de Méindeg de Moien op enger Pressekonferenz betount an en Appell un d'Leit gemaach, un der Vollekszielung Deel ze huelen:

"De Recensement ass en acte citoyen. Et ass eppes, wat der Kollektivitéit hëlleft, dem Statec hëlleft, uerdentlech Statistiken ze produzéieren an dono der Politik ze gutt kënnt, fir besser a faktebaséiert politesch aktiv ze sinn", sou de Franz Fayot.

Franz Fayot: "Mir zielen, well Dir zielt!"

Et géif drëms goen, e präziist Bild vun der Populatioun ze kréien, fir besser Analysen a Statistike kënnen ze maachen . De Recensement wier indispensabel: "Well en net just op d'Zesummesetzung vum Stot ageet, mä och Froe stellt iwwert d'Sprooch, déi geschwat gëtt, iwwert d'Educatioun, de Bildungsniveau vun de Leit, hir Aarbecht, wat a wéi vill se schaffen. Awer och Informatiounen iwwert d'Mobilitéit an iwwert de Logement."

Vollekszielung 2021 / Rep. Claudia Kollwelter

Nei ass dës Kéier awer och, datt Froen iwwert en Handicap gestallt ginn - dat op Demande vum Familljeministère. Eng zentral Roll bei der Vollekszielung géifen d'Gemenge spillen, huet de Wirtschaftsminister ënnerstrach: "Well se einfach déi bescht Kenntnisser hu vun hiren Awunner. Se wësse genee, wien an enger Gemeng wunnt a sinn dofir zentral wichteg, fir dat kënnen op eng effikass Manéier ze maachen."

De Vizepresident vum Syvicol, de Serge Hoffmann, betount, datt de Recensement mat vill Aarbecht verbonne wier an huet awer och d'Wichtegkeet dovun ervirgestrach, well de Regëster net 100% perfekt wier: "Virun allem, well mer de Phänomen hunn, datt Leit an d'Ausland zréck plënneren an net ofgemellt sinn an op Lëschte figuréieren, obwuel se net méi do sinn." Den Direkter vum Statec de Serge Allegrezza erkläert, datt ouni d'Vollekszielung et fir si ganz schwéier wier, all Zort vun aner Enquête ze maachen: "All déi Enquêten, déi mer maachen, brauchen ëmmer eng Base vun där den Universum vun deene Leit gezu gëtt. An deen Universum, also déi ganz Populatioun, gëtt iwwert de Recensement gemaach an dee muss dann natierlech och vu gudder Qualitéit sinn."

All 10 Joer gëtt e Recensement gemaach an ass gesetzlech festgehalen. E gëtt dëst Joer an hybrider Form gemaach, also souwuel digital wéi och a Pabeierform. De Statec rechent allerdéngs domat, datt de Gros vun de Formulairen online wäert ausgefëllt ginn. De Budget vun der Vollekszielung läit bei 5,3 Milliounen - 8,30 Euro pro Persoun.

All Stot kritt per Post e Code geschéckt, fir d'Formulairë via guichet.lu auszefëllen.