78 Prozent vun de Residenten zu Lëtzebuerg sinn der Meenung, datt d'Mënscherechter hei am Land respektéiert ginn.

Wat wëssen d'Leit iwwert déi Problematiken, mat deene mir eis Dag fir Dag beschäftegen?

Déi Fro huet sech d'ONG Frères des Hommes gestallt a fir eng Äntwert ze kréien, huet se bei TNS Ilres eng Etüd an Optrag ginn.

Sondage Frères des Hommes / vum Dany Rasqué

Eng Etüd, an där d'Residenten zu Lëtzebuerg zum Beispill Froe gestallt kruten iwwert de Klima, d'Biodiversitéit, d'Egalitéit tëschent Mann a Fra, d'Mënscherechter an d'Rechter vun de Baueren. D'ONG wollt wëssen, op wéi enge Punkten een déi eege Strategie vläicht muss upassen.

Een dovunner ass de Klimawandel. 85 Prozent vun de Leit hunn nämlech gesot, datt si sech bewosst sinn, datt de Mënsch fir de Klimawandel responsabel ass.

De Gilles Dacheux, de Coordinateur vu Frères des Hommes:

"Fir eis ass dat eng gewësse Victoire. Bis elo hu mer nach ni eng Etüd gehat, déi eis zum Beispill konnt soen, wéi vill Klimaskeptiker et gëtt. Elo wësse mer, datt dee Pourcentage zu Lëtzebuerg just bei 15 Prozent läit. Dat implizéiert fir eis, datt mer eis Strategie mussen änneren. Mir brauchen de Leit net méi ze soen, datt de Klimachangement duerch Aktivitéite vu Mënschen entsteet, mir mussen éischter probéieren, hinne Piste mat Léisungen ze weisen, fir dat eisen CO2-Impakt op d'Ëmwelt erofgeet."

Wat d'Mënscherechter betrëfft, koum e Resultat eraus, iwwert dat d'ONG sech och scho vill Gedanke gemaach huet.

Op d'Fro, ob zu Lëtzebuerg d'Mënscherechter respektéiert ginn, hunn 78 Prozent mat Jo geäntwert. Dat bedeit awer anengems, datt all 5. der Meenung ass, datt d'Mënscherechter net respektéiert ginn.

"Wéi ass et méiglech, datt 22 Prozent vun de Mënschen denken oder d'Gefill hunn, datt d'Mënscherechter net respektéiert ginn. Et muss een sech d'Etüd méi am Detail ukucken, fir eraus ze fannen, wou dës Opfaassung hierkënnt, mä et weist sécher op verschidde Problemer hin."

D'Resultater vun dëser Ëmfro well Frères des Hommes mat aneren ONGen oder Associatiounen zu Lëtzebuerg deelen an och bei verschidden Aktiounen notzen, wou drëm geet, Kanner oder Jonke bäizebréngen, wat Entwécklungshëllef ass.

D'Strategie fir déi nächst 3 Joer huet Frères des Hommes schonn opgrond vun de Resultater adaptéiert. Méi Informatiounen iwwer Frères des Hommes an hiren Engagement fënnt een op fdh.lu