Déi Gréng hunn de Mëttwoch de Moien zum Start vun der politescher Rentrée eng Pressekonferenz aberuff.

Méi Klimaschutz, méi sozial Gerechtegkeet a méi abordabele Wunnraum. Dat fuerderen déi Gréng fir d'Rentrée 2021/22. Et hätt een nach knapp d'Hallschent vun der Legislaturperiod viru sech an deemno wier et net Zäit, fir ze polemiséieren oder nei Walprogrammer ze schreiwen, mä fir nach déi eng oder aner Mesure ëmzesetzen.

Do virop natierlech de Klimaschutz. Et gëtt enk, fir d'Klimaziler z'erreechen, déi ee sech mam Paräisser Accord gesat huet. Den IPCC-Rapport dëse Summer hätt och nach eemol ganz däitlech gewisen, wéi grouss d'Urgence wier. Dofir misst ee kucken, wou ee kéint méi wäit goe wéi bis ewell. Notamment soll weiderhin op méi Elektromobilitéit gesat ginn, erkläert de Co-Parteipresident vun déi Gréng Meris Sehovic.

„Mir hunn do e ganzen Hëllefsregime op d'Bee gestallt, fir dofir ze suergen, dass emissiounsfräi Mobilitéit net just eppes ass, fir déi, déi sech dat leeschte kënnen. A wann een elo e bëssen de Marché kuckt, da gesäit een, dass mat deene Primmen déi mer op de Wee bruecht hunn, den emissiounsfräien Auto genee souvill kascht wéi den Diesel oder de Bensinner an der selwechter Kategorie. A soulaang de Marché dat net hiergëtt, musse mer dat onbedéngt weider intensivéieren."

Dofir wéilt een d'Primme fir Elektro-Gefierer iwwer de Mäerz 2022 eraus verlängeren. Och d'Industrie misst weiderhin dekarboniséiert a bei hirer Transitioun ënnerstëtzt ginn.

"Dat heescht fir eis, bësse wéi de Klima-Pakt fir d'Gemengen, och ee Klima-Pakt fir d'Entreprisen, wou mer zwou Saache maachen: Begleedung duerch technesch Hëllefsstellungen, well dat heiansdo grad den Defi ass fir kleng a mëttelgrouss Betriber, fir déi Transitioun hinzekréien an hire Produktiounsprozesser. Dat heescht, déi brauchen technesch Ënnerstëtzung a finanziell Ënnerstëtzung an dat alles musse mer bündelen an engem Instrument."

Rentrée bei déi Gréng / Rep. Annick Goerens

Donieft misst ee weiderhin u méi abordabelem Wunnraum schaffen. Dat wier och eng Fro vu sozialer Gerechtegkeet, well ëmmer méi Leit Problemer um Wunnengsmaart hätten. Dofir wier et net just d'Hoffnung, ma déi konsequent Fuerderung un d'Regierung, fir eng Reform vun der Grondsteier ëmzesetzen. D'Co-Parteipresidentin Djuna Bernard:

"Debatte ronderëm musse geféiert ginn, d'Modalitéite mussen politesch diskutéiert ginn. Mir kënnen eis net hannert deene Gemenge verstoppen, déi hire PAG nach net fäerdeg ausgeschafft hunn, mä mir mussen do elo schonn Léisungen ubidden. An dozou gehéiert och d'Diskussioun iwwer eng Grondsteier-Reform natierlech och ambitiéis Fiskalmesuren, déi domadder Hand an Hand ginn, géint d'Spekulatioun a géint de Leerstand."

Och den héijen Aarmutsrisiko hei am Land hunn déi Gréng thematiséiert. Besonnesch Monoparentauxe wiere mat 41,3 Prozent méi heefeg dovunner concernéiert. Dofir dierft een net eng grouss Steierreform ofwaarden, déi souwisou net méi bis 2023 géing kommen. Et misst ee konkret steierlech Hëllefe virgesinn, sou d'Parteipresidenten Djuna Bernard a Meris Sehovic.