En Donneschdeg de Moie géint 8.30 Auer huet et op der A1 Richtung Stad gerabbelt. Eng Persoun gouf dobäi liicht blesséiert.

Wéi de CGDIS mellt, krute sech 4 Autoen an der Montée Mënsbech ze paken. Déi mëttelst Spuer war blockéiert an och déi riets Spuer huet misse gespaart ginn.

Dësen Accident am Haaptberuffsverkéier, hat nawell fir e fatzege Stau gesuergt. Géint 10.15 Auer war den Accident geraumt. Am Asaz waren d'Ambulanze vu Jonglënster an aus der Stad, grad ewéi d'Pompjeeë vun Nidderaanwen a Mensder.

Zwee Camionen sinn tëscht Stroossen an Helfent matenee kollidéiert. Dat huet dann och fir e Réckstau bis op d'Héicht vum Briddel an a Géigerichtung bis un d'Zéissenger Kräiz gesuergt, wéinst zäitweileger Iwwerlaaschtung vun der Ausfaart Helfent.
Wéi d'Police mellt, gouf de Moie kuerz virun 11 e Vëlosfuerer am Rollengergronn ugestouss a blesséiert. Eng Fra krut de Cyclist mat hirem Gefier ze packen, wéi si vun der Rue de Kopstal an d'Rue de Rollingergrund a Richtung Stad agebéit ass. De Mann um Vëlo gouf vu sengem Vëlo op d'Fuerbunn geschleidert a koum blesséiert an d'Spidol. Wéi et zum Accident komme konnt, ass nach net kloer.

Ëm 13.15 Auer gouf et dunn nach een Accident op der A13 tëscht Gadderscheier an dem Tunnel Aessen. Ee Camion an een Auto waren do net laanschtenee komm. Et waren eng Ambulanz an d'Pompjeeë vun Esch an Suessem an Déifferdeng am Asaz.