Vill Prozedure wieren administrativ ze laangwiereg a komplizéiert. Och dowéinst fuerdert den LCGB eng méi einfach a séier Kommunikatioun mat de Clienten.

"E Reformstau", esou nennt den LCGB déi aktuell Situatioun wat d'Sécurité sociale ugeet. No der Gesondheetsreform 2011 wier d'Regierung nämlech an e Stëllstand geroden. Um Gesondheetsdësch missten elo dowéinst Problemer diskutéiert ginn, déi 10 Joer laang ugesammelt goufen. D'Fuerderunge vun der Gewerkschaft dréine sech haaptsächlech ronderëm méi séier Prozeduren an e bessere Service um Client.

Vill Prozedure wieren einfach ze komplizéiert a géingen ze laang daueren. Fir deem entgéint ze wierken, wier en éischte Schrëtt, dass en direkte Kontakt bei der Gesondheetskeess en place gesat gëtt. D'Patiente wéissten, u wien si sech kéinte wenden, fir esou och méi einfach gehollef ze kréien.

LCGB fuerdert méi séier Prozeduren / Reportage Monica Camposeo

D'78-Woche-Reegel misst ofgeschaaft ginn, och dat gouf vum LCGB gefuerdert. Dës Reegel gesäit fir, dass de Krankeschäin op 78 Woche limitéiert ass. Schwéier krank Leit géingen doduerch no där Zäit duerch all Raster falen. Dat wier eng "onmënschlech Mesure", sot de Christophe Knebeler, Vize-Generalsekretär vum LCGB.

Kritiséiert goufen dann och d'Ënnerscheeder, déi et zum Deel nach ëmmer tëscht Residenten a Frontaliere gëtt. Den elektronesche Krankeschäin, deen an der Maach ass, dierft zum Beispill och keen ausloussen, esou de Christophe Knebeler, Vize-Generalsekretär vum LCGB.

RTL

Wat de Finanzement ugeet, sollt elo preventiv gehandelt ginn, ier d'Keess iergendwann net méi duer geet a Prestatioune musse gekierzt ginn. Dat wéilt een als LCGB net zouloossen. Iddien, déi genannt goufen, war zum Beispill e Gesondheetsfong oder d'Erhéijung vu Cotisatiounen op Dividenden, déi den Aktionären ausbezuelt ginn.

Wat d'Finanze vun der Gesondheetskeess ugeet, gesäit den LCGB d'Situatioun net esou stabel, wéi de Staat. Dowéinst sollten alternativ Finanzement-Sourcë fonnt ginn. Elo wieren zwar nach genuch Suen do, mee et misst och laangfristeg gekuckt ginn. Als Beispill fir eng alternative Source vu Finanzement huet d'Gewerkschaft e Gesondheetsfong genannt.

RTL

© RTL