Fridays for future organiséiert eleng an Däitschland an Honnerte Stied Manifestatiounen. Zu Lëtzebuerg ass et Youth for climate, déi dat Ganzt initiéiert.

Um 10 Auer war Rendez-vous op der Stater Gare. Vun do aus goung et um 10.45 Auer dann am Cortège op de Glacis, wou och Riede gehale ginn a Kënschtler optrieden. Wéi d'Police matdeelt, wieren eng 2.500 Schüler bei dësem Cortège mat dobäi. D'Organisateure vu Youth for Climate schwätze vu ronn 3.000.

Wéi d'Zohra Barthelemy vu Youth for Climate op Nofro sot, wier een zefridden no 2 Joer Paus wéinst der Pandemie, dass esou vill Leit matgemaach hunn. An hiren Ae mécht d'Politik einfach ze wéineg an d'Fuerderunge sinn dowéinst kloer: Klimaneutralitéit bis 2030, méi sozial Gerechtegkeet a Gesetzer, déi bezilt géint de Klimawandel virginn.

Klimastreik / Reportage Monica Camposeo

D'Natasha Lepage vu Youth for Climate betount, dass de PNEC, also den nationalen Energie- a Klimaplang, virgesäit, dass bis 2030 55 Prozent vun den CO2-Emissioune par Rapport zu 2005 sollen agespuert ginn. Dat géing net wäit genuch goen fënnt d'Organisatioun. An der Pandemie hätt ee gemierkt, dass d'Politik och séier handele kann. Dat sollt elo och géint d'Ressourcëverschwendung an d'CO2-Emissioune gemaach ginn.

D'Monica Camposeo mat Impressioune vun der Manifestatioun

An Däitschland sot déi schwedesch Klimaaktivistin Greta Thunberg bei hirer Ried virum Reichstag, keng politesch Partei géing genuch maachen, fir géint d'Klimakris ze kämpfen. "Jo, mir musse wiele goen, dir musst wiele goen, mee denkt drun datt wielen eleng net duer geet - mir musse weider op d'Strooss goen."

Klimamaniff zu Berlin
Schaarf Kritik kënnt vun den Demonstranten zu Berlin: Dës Wal soll eng Klimawal ginn.