Um Freideg de Moie koum et zu enger rëtsch Accidenter, wou insgesamt 4 Leit blesséiert goufen.

Ee Moto an een Auto krute sech an der Areler Strooss um Belair ze paken, dat géint 6 Auer. D'Automobilistin hat, eegenen Aussoen no, de Motorradsfuerer iwwersinn, wéi si no lénks an d'Rue Val Fleuri ofbéie wollt. De Moto war hannert engem Auto ënnerwee. De Motocyclist gouf mat Bréch an d'Spidol ageliwwert, et besteet awer keng Liewensgefor. Op der Plaz waren d'Pompjeeën an d'Ambulanz aus der Stad, grad ewéi de Samu.

Géint 9.30 Auer ass zu Kënzeg op der Kräizung vun der Rue Basse an der Käerjenger Strooss e Motocyclist blesséiert ginn, nodeem eng Automobilistin ofbéie wollt an de Motorrad iwwersinn hat. D'Fra hat nach en Auto laanscht gelooss, hat awer dono de Motorrad gesinn huet. De Motocyclist ass an d'Säit vum Auto gerannt a gefall. Éischten Indicen no gouf de Mann net blesséiert, hie koum awer fir eng Kontroll an d'Spidol.Hei waren de CIS Käerjeng, d'Ambulanz vu Suessem-Déifferdeng an e Samu am Asaz.

Op der RN05B tëscht Péiteng an Athus an der Belsch koum et zu enger Kollisioun tëscht zwee Autoen. Hei goufen 2 Persoune blesséiert. De CIS vu Péiteng an d'Ambulanz vu Suessem-Déifferdeng goufe mobiliséiert.

A kuerz virun der Mëttesstonn e Freideg huet d'Police engem Automobilist de Führerschäin ofgeholl, deen ze vill gedronk hat an en Accident beim Rond-point Katrewang verursaacht huet, dobäi war awer kengem eppes geschitt.