An Zukunft sinn zwee Parteipresidenten an zwee Generalsekretäre méiglech, déi mussen awer paritéitesch besat ginn, also eng Fra an e Mann.

D'CSV-Fraktiounspresidente Martine Hansen a Gilles Roth grad ewéi de Parteipresident Claude Wiseler hunn d'Geleeënheet genotzt, fir um ausseruerdentleche Kongress zu Uewerkuer op aktuell Problemer a Prioritéiten anzegoen. Een zentraalt Thema fir CSV ass d'Klimapolitik. Et wier déi gréissten Erausfuerderung, sou de Claude Wiseler, net nëmme fir Lëtzebuerg. Och a Saachen Digitaliséierung wier eng Acceleratioun néideg.

Als Oppositiounspartei wier een, wat d'Educatioun betrëfft, a leschter Zäit roueg gewiescht, ma dat géif elo änneren. D'Martine Hansen huet hei eng ganz Rei Kriticke geäussert, zum Beispill wat d'Europaschoulen ubelaangt. Den Här Meisch géif domat eng parallel Schoulwelt schafen an hätt a Saache Quereintseiger an Educateursdiplom och déi falsch Approche. D'Schoulflicht bis 18 Joer gesäit d'CSV weider kritesch a waart op Detailer. Och d'Sécherheet am Land an d‘Verfassungsreform waren Themen um ausseruerdentlechen CSV-Kongress.

Betreffend d'Partei selwer sot de Claude Wiseler, datt een et fäerdeg bruecht hätt, d'Partei nees ze berouegen an den Zuch erëm op d'Schinnen ze bréngen. Et wier een awer nach net do, wou ee wéilt sinn. Notamment wier jo och d'Affär ronderëm de fréiere Parteipresident net ofgeschloss.

Sämtlech Statutenännerunge goufen um Kongress ugeholl

An Zukunft sinn deemno zwee Parteipresidenten an zwee Generalsekretäre méiglech. Déi mussen awer paritéitesch besat ginn, also eng Fra an e Mann. Ugeholl gouf och, datt et bei Wale méi wéi eng Persoun nationale Spëtzekandidat däerf ginn, also eng Duebelspëtzt.

Bis den nächste Kongress, deen Enn dës Joers soll sinn, gëllt eng Iwwergangsreegelung. Bis dohinner kënnen och nach Leit fir oppe Poste kandidéieren, woubäi jo am Abrëll schonn Ekippe virgestallt goufen.

D'CSV wëll sech méi breet opstellen, huet et um Kongress geheescht. Si wëll als Ekipp schaffen a sech awer och eng gewësse Flexibilitéit loossen.

Wou wëll d'CSV hin? Wéi positionéiert se sech?

Dacks géif am Kontext vun deene Froe versicht ginn, der Partei e Stempel opzedrécken, sou de Claude Wiseler. Ma et wier keng Këscht grouss genuch, fir all d‘Memberen dranzestiechen, also an een Dëppen ze geheien. D‘CSV wier weder riets nach lénks, mä bei de Leit, an der Mëtt vun der Gesellschaft.

Et wéilt ee fir déi ganz Populatioun d'Zukunft virbereeden, ouni Ideologie an ouni Scheiklappen. Mat Häerz, Séil, Engagement an Ausdauer, sou d'Schlusswierder vum Parteipresident Claude Wiseler.

Extrait Claude Wiseler