Déi Lénk gesi sech als öko-sozialistesch Alternativ a setze sech d'Zil, esouvill Wieler wéi méiglech fir hir Iddien ze mobiliséieren.

Déi Lénk schaffen un enger Strategie fir déi nächst Walen 2023, "ökologesch-sozialistesch" wier déi. Se kréich am Abrëll hiren definitiven Inhalt a mat deem géing een dann an der Lëtzebuerger Polit-Landschaft eng wierklech Alternativ duerstellen. Um 18. uerdentleche Kongress zu Réimech gouf d'Koalitioun "iwwerhieflech" genannt. Der Regierung wiere virun allem déi vulnerabelst an eiser Gesellschaft egal, wéi een am Ëmgang mat der Covid-, mä och der Klimakris geséich. Mat deene Lénke kéime radikal Léisungen. Aus der Schlass-Strooss géint Kapitalismus, Arroganz a Getriwwels, Lénk wëllt keng Zäit verléieren an d'Problemer elo  ugoen. An der Chamber ginn hir zwee Zuchpäerd an d'Offensiv a weise mam Fanger op eng Zort Phlegma, d'Deputéiert wieren dacks passiv a vill Interventioune kéimen engem pro forma vir, sou d'Nathalie Oberweis. Et kéim ee sech alt fir, wéi wann ee just Deko wier an dat ganzt géif Froen zum Demokratieverständnes opwerfen.

D'Regierung ass fir d'Deputéiert vun déi Lénk eng ouni Visiounen an op kee Fall op der Héicht. Déi radikal Instrumenter, déi se an der Covid-Kriis gebraucht hätt, bräichte mer och am Normalen, an der Klimapolitik, an där fir de Logement och. Do kéim awer näischt aus der Koalitioun, och net vun de Sozialisten.

Si waren a wiere nach ëmmer méi konsequent gewiescht wéi eng LSAP a mat déi Lénk géif et absolut keng Kompromësser, wann et ëm den ëffentlechen Intressi géing, erkläert de Gary Diderich vun déi Lénk. Am Abrëll géif hir ökologesch-sozialistesch Strategie finaliséiert, béides misst nämlech Hand an Hand goen.

"Mir waren nach ëmmer sozialistesch orientéiert an nach ëmmer méi konsequent, wann et drëm gaangen ass, fir den Intérêt commun no Vir ze stellen an net déi Kompromësser ze maachen. Et ass net "esou schlëmm mat eis" wéi ouni eis. Well dat geet eis net duer, dat geet de Leit net duer an dat gëtt der Situatioun net gerecht. Dofir ass fir eis Ökologie Sozialismus eppes, wat Hand an Hand geet a wou ee muss déi Decisiounen huelen, déi déi zwou Saache beienee bréngen an net déi, déi se géinteneen ausspillen. Dëse Kongress huet ganz kloer decidéiert, datt mir am Abrëll eng öko-sozialistesch Strategie fäerdeg entwéckelen. Dës ass op den Lëtzebuerger Kontext adaptéiert a wou ee wierklech e Projet huet fir Lëtzebuerg, wéi een eng sozial an ökologeschgerecht Gesellschaft a Wirtschaft kann entwéckelen zu Lëtzebuerg.

Den David Wagner, deen de politeschen Alldag gutt kennt a lo mol nees studéiere geet, fënnt, dass Partei d'Ënnerstëtzung vun deene Leit bräicht, fir déi soss keen Deputéierte sech asetzt an déi dobausse fir hir Intressien antrieden. Déi Lénk géingen schonn eng gutt Aarbecht maachen, dierfte sech awer net op d'Schëller klappen a sech domadder zefridde ginn.

D'Geschicht vun der Mënschheet wier keen Hollywood-Film an en Happy End wier net garantéiert, sou de David Wagner.