E Méindeg de Moie sot de fréiere Lëtzebuerger Premierminister Jean-Claude Juncker, dass senger Meenung no d'SPD an der nächster Regierung misst sinn.

Reaktioune vu Berlin
Berlin, sou wéi ganz Däitschland, erwächt e Méindeg de Moie mat vill Ongewëssheet. Et gouf gewielt, ma wëssen awer nawell net, wien neie Kanzler gëtt.
Den Interview mam Jean Asselborn
Den Ausseminister war Invité um Plateau vum RTL-Journal.

Reaktioun vun der LSAP

"D'SPD ass zréck, a vläicht kann ee souguer soen, d'Sozialiste sinn zréck" seet den LSAP-Parteipresident Yves Cruchten zum Resultat vun den däitsche Walen, wann een och d'Resultater an aneren europäesche Länner géing kucken.... e Momentum, vun deem d'Sozialisten hei am Land profitéiere kënnen?

Den Yves Cruchten (LSAP)

"Et ass evident, dass d'Resultater vun der sozialistescher Partei zu Lëtzebuerg och ëmmer am Trend sinn vun den Nopeschlänner. Dat ass bei alle Parteien esou. Eis Wale sinn eréischt an 2 Joer, et kann also nach vill geschéie bis dohinner. Ech huelen dofir dee Moment do mat als mol eng Kéier en erfreeleche Moment fir d'Sozialisten an d'Sozialdemokraten an ech hoffen, dass mer dat hei zu Lëtzebuerg och eng Kéier kënne soen."

Elo misst sech eng Majoritéit fannen, ma d'Zoustëmmung, déi den Olaf Scholz hätt, par Rapport zum Armin Laschet, misst een dann awer als Regierungsoptrag verstoen.

Reaktioun vun der CSV

Den CSV-Parteipresident ass enttäuscht vum Resultat vun der Union, d'CDU hätt op alle Fall net méi den éischten Usproch op d'Kanzleramt, seet de Claude Wiseler:

"Op där anerer Säit soen ech awer grad sou gutt hannendrun, ass et wichteg, dass eng stabil Majoritéit an Däitschland zesummekënnt a bei den Negociatioune musse mer mol kucken, wat erauskënnt. Ech mengen, datt eng Regierung mat CDU trotzdeem eng Rei Avantagen hätt, notamment déi vun der Stabilitéit."

"Ob et elo 3 Faarwen op där enger oder 3 Faarwen op där anerer Säit ass, et gëtt komplizéiert, mä fir mech ass d'Resultat dat wichtegst. Däitschland ass awer an Europa eent vun deene wichtegste Länner a mir brauchen, egal wéi se ausgesäit, eng staark däitsch Regierung, déi weess wou se higeet, an déi hëlleft dat Europa mat steieren, dat ass fir mech wesentlech. Ech sinn elo mol och frou, dass awer déi Parteien, déi an der demokratescher Mëtt vum Spektrum leien hei trotzdeem déi Parteie sinn déi wäerten, egal wéi et ausgesäit eng Regierung bilden, an datt op där enger an op där anerer Säit d'Extremen awer hei ganz kloer kee Regierungsoptrag kruten, dat ass schonn op d'mannst eppes dat berouegt."

D'Reaktiounen op d'Bundestagswalen - Rep. Fanny Kinsch

Reaktioun vun der DP

Och fir den DP-Generalsekretär Claude Lamberty ass d'Unioun nach net aus der Course - dat géing vun der FDP an de gréngen ofhänken, an déi misste sech elo mol eens ginn: "D'FDP an Däitschland ass jo eng relativ staark wirtschaftsliberal Partei, dat ass bëssen anescht zu enger DP hei zu Lëtzebuerg, trotzdeem mengen ech wäerten déi och ganz staark den Accent op d'Fiskalpolitik zum Beispill an Däitschland leeën, dat huet de Lindner jo och schonn ëmmer am Walkampf gesot, do muss een elo kucke wou d'Schnëttmenge mat deene Grénge sinn, Scholdebrems jo oder nee, dat heescht do mengen ech ass schonn e Konfliktpotential do, deen awer duerchaus léisbar ass."

Reaktioun vun deene Gréngen

An och eng aner Lëtzebuerger Partei huet sech gëschter mat gefreet...Déi gréng Parteipresidentin Djuna Bernard: “Et ass wierklech fantastesch ze gesinn, wéi vill Jonker, wéi vill Fraen och an de Bundestag elo erakommen, Direktmandater, déi mer kritt hunn, dat ass effektiv eng Situatioun, do ware mer nach ni an an deem Sënn gëtt et absolut grousse Grond fir sech ze freeën a mir freeën eis mat hinnen a gläichzäiteg ass een natierlech elo ganz gespaant, wéi et weider geet an deene Sondéierungsgespréicher, déi elo ustinn, well ganz kloer ass och déi nächst Regierung gëtt eng Klimaregierung an ech wënsche mer natierlech, dass déi gréng an Däitschland och do vertruede wäerte sinn.”

D'Djuna Bernard (Déi Gréng)

D'Resultat vun de gréngen an Däitschland géing weisen, datt gréng Theme vun enger grousser Majoritéit vun de Leit gestëmmt géing ginn, sou d'Djuna Bernard, an dat géing och de gréngen hei am Land Réckewand ginn.

Reaktioun vun deene Lénken

Komplett vum Dësch ass eng Koalitiounsoptioun, déi am Walkampf grousst Thema war. Fir Rot-Rot-Grün geet et wéinst dem schlechte Resultat vun der Linke net duer... d'Wieler hätte gewisen, datt si Verännerung wéilten, seet de Spriecher vun déi Lénk Gary Diderich, mä: "Eis Lecture ass, dass einfach d'Kanzlerkandidatefro esou am Virdergrond stoung, dass Die Linke dotëscht zerdréckt ginn ass, an net déi sécherst Optioun an den Ae vun de Wieler war, fir de Changement ze kréien, dee gewënscht war."

"Ech denken de Problem, firwat Rout-rout-gréng sech net konnt duerchsetzen ass ënnert anerem deen dass se net wierklech zesummen e gemeinsame Projet ausgeschafft hunn. Dat heescht Die Linke hat de Projet, hat e Sofortprogramm op den Dësch geluecht, awer déi aner hu sech all aner Optiounen oppe gehalen an domat net konsequent genuch an eng Richtung geschafft. Dat ass deen ee Problem, deen anere Problem ass natierlech wann Campagne géint dech gemaach gëtt a wann eng grouss Vollekspartei näischt anescht ze bidden huet wéi Campagne géint en alternative Modell ze maachen, dann ass dat éischter en Aarmutszeugnis vun där Partei."

Conclusioune fir déi Lénk zu Lëtzebuerg wëll de Gary Diderich net direkt zéien - die Linke wieren och ze vill mat interne Streidereie beschäftegt gewiescht wärend dem Walkampf - dee Problem hätten déi Lénk net.

Reaktioun vun der ADR

D'ADR kann d'Resultater an Däitschland mat méi Distanz observéieren, si huet keng Schwësterpartei an Däitschland. Et wier kloer, datt d'Klimafro an Europa ganz wichteg wier a bleift, seet de Parteipresident Jean Schoos, ma wat hien am meeschten iwwerrascht hätt, wier datt d'FDP grad bei de jonke Wieler och ganz gutt ofgeschnidden huet: "Do hunn déi 2 al grouss Volleksparteie ganz vill verluer a bal keng Wieler an deem Sënn an do si ganz dominant engersäits déi Liberal, déi wierklech Liberal sinn an Däitschland, an op där anerer Säit déi gréng, an do gesäit ee ganz kloer, dass vläicht déi reng gréng Ideologie och net d'Léisung si kann, esou wéi och warscheinlech déi reng wirtschaftlech Ideologie se net ass."

Reaktioun vum Jean-Claude Juncker

An enger éischter Reaktioun de Méindeg de Moien sot de fréiere Lëtzebuerger Premierminister Jean-Claude Juncker, a sengen Ae misst d'SPD an der nächster däitscher Regierung sinn.

Reaktioun vum Jean-Claude Juncker

"D'SPD ass däitlech déi stäerkste Partei, wann ee bedenkt wéi hiert Resultat déi leschte Kéier war, se hu 5 oder 6 Prozent dobäi geluecht. Dofir schéngt et mer schwiereg ze sinn, laanscht d'SPD ze kommen, wann et ëm d'Bildung vun enger neier Regierung geet. Ech si prinzipiell der Meenung, dass déi stäerkste Partei ëmmer soll an der Regierung vertruede sinn."

Senger Opfaassung no géing et der Demokratie net gutt doen, wann déi stäerkste Partei net direkt a Regierungsgespréicher involvéiert wier. Elo géing d’Initiative awer weder bei der SPD nach bei der CDU leien, mee bei de "Königsmacher" FDP an de Gréngen. Et hätt der CDU iwwerdeems gutt zu Gesiicht gestanen, wa si Feeler am Walkampf zouginn hätt. Am Jean-Claude Juncker sengen Aen hätten Deeler vun der CDU sech ze vill oppe vis-à-vis vun der AfD gewisen, an dat wier vun der Parteispëtzt net genuch bekämpft ginn.

De fréieren EU-Kommissiounspresident Jean-Claude Juncker seet sengersäits am RTL-Interview, hie géing keng gréisser Auswierkung op Europa gesinn, jee nodeem wéi d'Regierung sech elo zesummesetzt:"An Däitschland gëtt et eng breet Zoustëmmung zu der europäescher Integratioun, ob de Laschet elo Kanzler gëtt oder de Scholz, ech kennen déi 2 gutt, dat ännert näischt un der fundamentaler pro-europäescher Attitüd vun Däitschland. Dat ass berouegend fir d'Nopere vun Däitschland. A Frankräich ass dat e bëssen anescht. Do ass de Macron däitlech pro-europäesch, seng Konkurrente sinn entweder dogéint oder se si mat villen Nuancen nëmmen hallef dofir. An Däitschland gëtt et eng pro-europäesch Linn, déi gëtt bäibehalen, egal wie Bundeskanzler gëtt an egal wéi d'Regierung sech zesumme setze wäert."

De Jean Claude Juncker

Interview mam Jean Asselborn

Däitschland ass do ukomm wou mer schonn a villen anere Länner an Europa sinn, bei der Zersplitterung vun der Parteilandaschaft. Dat sot de Jean Asselborn um Méindeg de Mueren am RTL-Moiesjournal. Wéi eng Koalitioun besser fir Lëtzebuerg wier, wollt den LSAP-Politiker net soen. Aus senger perséinlecher Siicht, wier et awer net onlogesch, datt SPD, FDP an Déi Gréng sech géife fannen. Interessant wier zum Beispill och, wie Finanzminister gëtt a wat a Saache Klimapolitik bei enger Regierungsbedeelegung vun Déi Gréng decidéiert géif.

Wann d'Koalitiounsverhandlungen laang daueren, wier dat op alle Fall schlecht fir Europa, vue d'Importenz vun Däitschland. Elo misst een ofwaarden wat an den nächsten Deeg decidéiert gëtt.

De kompletten Interview mam Ausseminister Jean Asselborn